जळगाव गुन्हे शाखेची कामगिरी : गावठी पिस्टल व पाच जिवंत काडतूसासह संशयीत जाळ्यात
जळगाव (6 ऑगस्ट 2025) : यावल तालुक्यातील हॉटेल चालकावर गोळीबार केल्याप्रकरणात एका आरोपीला अटक केल्यानंतर चौकशीदरम्यान त्याने जळगावातील एकाला पिस्टल विक्री केल्याची कबुली दिल्यानंतर पथकाने आरोपी अक्षय अजय जयस्वाल (24, रा. शिवाजी नगर, जळगाव) यास अटक केली. आरोपीकडून गावठी पिस्टल व पाच जिवंत काडतूस जप्त करण्यात आले.
अशी झाली कारवाई
यावल पोलीस ठाण्यात खुनाचा प्रयत्न केल्याप्रकरणी गुन्हा दाखल होता. स्थानिक गुन्हे शाखेच्या पथकाने सखोल चौकशीला सुरूवात केल्यानंतर आरोपीने जळगाव येथील अक्षय अजय जयस्वाल याला एक देशी बनावटीचे पिस्तूल विकल्याची माहिती दिली. त्यानुसार स्थानिक गुन्हे शाखेचे वरिष्ठ पोलीस निरीक्षक संदीप पाटील यांनी पोलीस उपनिरीक्षक शरद बागल यांच्या नेतृत्वाखाली एक पथक तयार केले. पथकाने मंगळवार, 5 ऑगस्ट रोजी दुपारी तीन वाजता कारवाई करत संशयित आरेपी अक्षय जयस्वाल याला आंबेडकर मार्केट परिसरातून दुचाकीवर फिरत असतांना अटक केली. त्याची कसून चौकशी केली असता त्याने दुचाकीच्या सीट खाली पिस्तूल व 5 जीवंत काडतूस लपवलेले काढून दिले.
यांनी केली कारवाई
ही कारवाई जळगाव पोलीस अधीक्षक डॉ.महेश्वर रेड्डी, अपर पोलीस अधीक्षक अशोक नखाते, पोलीस उपअधीक्षक संदीप गावीत यांच्या मार्गदर्शनाखाली गुन्हे शाखेचे वरिष्ठ पोलीस निरीक्षक संदीप पाटील, पोलीस उपनिरीक्षक शरद बागल यांच्यासह हवालदार अकरम शेख, मुरलीधर धनगर, प्रवीण भालेराव, नितीन बाविस्कर, किशोर सोनवणे, सिद्धेश्वर हापकर, रवींद्र कापडणे, गोपाल पाटील यांच्या पथकाने केली.
