जळगावात अ.भा.मराठी नाट्य परिषदेच्या ‘नाट्यपरिषद करंडकाची’ प्राथमिक फेरी 23 ऑगस्टला

ही स्पर्धा प्राथमिक व अंतिम फेरी अश्या दोन फेर्‍यांमध्ये होणार आहे. शनिवार, 23 ऑगस्ट 2025 रोजी जळगाव केंद्रांवर नूतन मराठा महाविद्यालयाच्या नाट्य सभागृहात प्राथमिक फेरी होणार असून, पारितोषिकप्राप्त निवडक एकांकिकेची अंतिम फेरी मुंबई येथे 15 सप्टेंबर ते 18 सप्टेंबर दरम्यान यशवंतराव चव्हाण नाट्यसंकुल, मनमाला टँक रोड, माटुंगा-माहिम, मुंबई येथे होणार आहे.

अंतिम फेरीत निवड झालेल्या कलावंतांसाठी नाट्य कार्यशाळेचे आयोजन करण्यात येणार आहे. हे शिबिर नाट्यक्षेत्रातील दिग्गज दिग्दर्शक, अभिनेते, अभिनेत्री घेणार असून अंतिम फेरीतील सादरीकरणाचा दर्जा यामुळे सर्वोत्तम असणार आहे, अशी माहिती नाट्य परिषदेचे अध्यक्ष प्रशांत दामले यांनी दिली.

जळगाव जिल्ह्यातून 9 एकांकिकांनी या स्पर्धेत सहभाग घेतला आहे. शनिवार, 23 ऑगस्टला सकाळी आठ वाजता उद्घाटन झाल्यानंतर स्पर्धेत सुरुवात होणार आहे. यात रंगशाळा जळगाव निर्मित सख्खे शेजारी, दीपरंग भुसावळ औष्णिक विद्युत केंद्र दीपनगरची मानस, अभिनय नाट्यकला चाळीसगाव यांची ब्रेकअप, नाट्यरंग जळगाव यांची गाईड, नूतन मराठा महाविद्यालय नाट्यशास्त्र व सांस्कृतिक विभाग जळगाव यांची सुबन्या आणि…, समर्थ बहुउद्देशीय संस्था जवखेडे बुद्रूक, ता.एरंडोल यांची काजव्यांचे स्वप्न, समर्थ कला बहुउद्देशीय संस्था जळगाव यांची सांबरी, आप्पासाहेब विश्वासराव भालेराव प्रतिष्ठान जळगाव यांची दिशा, भाग्यदीप थिएटर्स जळगाव यांची हम तुम या एकांकिका सादर होणार आहेत.

या स्पर्धेला जळगाव जिल्ह्यातील नाट्यरसिकांनी उपस्थिती देवून, स्पर्धकांना प्रोत्साहन द्यावे, असे आवाहन अ.भा.मराठी नाट्य परिषदेचे अध्यक्ष प्रशांत दामले, उपाध्यक्ष (उपक्रम) भाऊसाहेब भोईर यांच्यासह नूतन मराठा महाविद्यालयाचे प्राचार्य डॉ.एल.पी. देशमुख, जळगाव केंद्रप्रमुख गीतांजली ठाकरे, समन्वयक योगेश शुक्ल, सहसमन्वय पवन खंबायत यांनी केले आहे.