जामनेरात पोलिसाने गुंड पाठवून दिली शिक्षकाला धमकी : 15 तासांच्या आंदोलनानंतर पोलिसाविरोधात गुन्हा

Police sent goons to threaten teacher in Jamner : Case filed against police after 15 hours of protest जामनेर (25 ऑगस्ट 2025) : जामनेरातील एका पोलिसाविरोधात गुन्हा दाखल झाला आहे व या कारवाईने पोलिस वर्तुळात मोठी खळबळ उडाली आहे. शिक्षक कुटुंबाने जामनेर पोलिस ठाण्यात 15 तास ठाण मांडून कैफियत मांडल्यानंतर पोलिस प्रशासनाने दखल घेत गुन्हा दाखल केला.

असे आहे नेमके प्रकरण ?
जळगाव रोडवरील ओमशांती नगरमध्ये लताबाई ठाकरे या सहकुटुंब राहतात. त्यांचा मुलगा गोविंद ठाकरे जिल्हा परिषद शाळेत शिक्षक आहेत. त्यांच्याच मागील कॉलनीत जामनेर पोलिस ठाण्यातील गोपनीय विभागाचे पोलिस कॉन्स्टेबल चंद्रकांत पाटील यांचे घर आहे. पाटील दररोज रात्री आमच्या घरासमोर 100 मीटर अंतरात फेर्‍या मातात व महिलांकडे अश्लील नजरेने पाहतात. याच कारणावरून महिन्याभरापूर्वीही आमच्यात वाद झाले होते. त्यावेळी जामनेर पोलिस ठाण्यात पोलिस निरीक्षक मधुकर कासार यांच्या मध्यस्थीने वाद मिटले मात्र त्यानंतरही पाटील हे आमच्याच गल्लीत फिरतात. याबाबत त्यांना विचारणा केली असता पाटील यांनी अश्लील शिवीगाळ करून गावगुंड बोलून मुलगा गोविंद ठाकरे यास जीवे मारण्याची धमकी दिली. याबाबत लताबाई ठाकरे यांनी दिलेल्या फिर्यादीवरून चंद्रकांत पाटील यांच्याविरुद्ध गुन्हा दाखल करण्यात आला.