मराठा समाज आरक्षण मागणीला भुसावळातील भीम आर्मीचा पाठिंबा

मराठा समाजाच्या आरक्षणासाठी संपूर्ण राज्यभर पुन्हा आंदोलनाची गरज भासू लागली असून, शासनाकडून दिरंगाई होत असल्याची भावना व्यक्त करण्यात आली. या आंदोलनाला भीम आर्मी भारत एकता मिशन, जळगाव जिल्हा युनिटकडून ठोस पाठिंबा देण्यात आला. जिल्ह्यात कुठेही मराठा समाजाचे आंदोलन झाले तर भीम आर्मी त्यात सक्रीय सहभागी होईल, असे जाहीर करण्यात आले. हा निर्णय सामाजिक ऐक्याचे आणि समजूतदारपणाचे दर्शन घडवतो.

त्याचबरोबर भुसावळ रेल्वे विभागातील एससी-एसटी प्रवर्गातील पदोन्नती प्रक्रिया लटकत असल्याचा आरोप करत, संबंधित अधिकार्‍यांविरोधात कारवाई न झाल्यास तीव्र आंदोलन करण्याचा इशारा देखील भिम आर्मीच्या वतीने देण्यात आला. सुप्रीम कोर्टाच्या निर्णयानंतरही रिक्त पदे न भरल्याने हजारो कर्मचार्‍यांमध्ये नाराजी आहे.

ही माहिती भुसावळात आयोजित पत्रकार परिषदेत भीम आर्मी भारत एकता मिशनचे जिल्हा प्रमुख गणेश भाऊ सपकाळे व जामनेर तालुका प्रमुख तथा जिल्हा प्रसिद्धी प्रमुख प्रबुद्ध खरे यांनी दिली. पत्रकार परिषदेस जिल्हा उपप्रमुख मुदस्सर खान, जिल्हा सचिव वैशाली पाटील, जिल्हा संघटक संदीप सपकाळे, भुसावळ तालुका प्रमुख जावेद शेख, तालुका उपप्रमुख अल्केश मोरे, तालुका संघटक विशाल वाघमारे यांच्यासह विविध पदाधिकारी मोठ्या संख्येने उपस्थित होते.

भीम आर्मी व आजाद समाज पार्टीने घेतलेली भूमिका ही सामाजिक न्यायासाठी आणि संविधानिक हक्कांच्या रक्षणासाठी महत्त्वाची ठरणार आहे. मराठा आरक्षणासोबतच अनुसूचित जाती-जमातींच्या हक्कासाठीही लढण्याचा निर्धार या संघटनांनी व्यक्त केला आहे