देशाची अर्थव्यवस्था मजबुतीसाठी स्वदेशी वस्तूंचीच खरेदी करा : भुसावळात मंत्री संजय सावकारे
भुसावळ (15 ऑक्टोबर 2025) : भारतीय अर्थव्यवस्था मजबूत व्हावी आणि देशातील उद्योगधंद्यांना प्रोत्साहन मिळावे यासाठी प्रत्येक नागरिकाने स्वदेशी वस्तूंचीच खरेदी करावी, असे आवाहन वस्त्रोद्योग मंत्री संजय सावकारे यांनी केले. ते येथील ब्राह्मण संघात आयोजित कोजागिरी पौर्णिमेनिमित्त कार्यक्रमात बोलत होते.
प्रतिमांचे अनावरण
कार्यक्रमाच्या सुरूवातीला संजय सावकारे यांच्याहस्ते ब्राह्मण संघ कार्यालयात राष्ट्रीय स्वयंसेवक संघाच्या शताब्दी महोत्सवी वर्षाचे औचित्य साधून डॉ.केशव बळीराम हेडगेवार, छत्रपती शिवाजी महाराज, स्वातंत्र्यवीर सावरकर, भगवान परशुराम, समर्थ रामदास स्वामी आणि श्री गजानन महाराज यांच्या प्रतिमांचे अनावरण करण्यात आले.
या कार्यक्रमात गायक दिनेश जोशी, प्रवीण कुलकर्णी, योगेश साळशिनिगीकर, मृणाल गाडगीळ आदींनी ‘जयोस्तुते’हे समूहगान सादर केले. यावेळी ताप्ती एज्युकेशन सोसायटीचे चेअरमन महेश फालक,माजी नगरसेवक निर्मल कोठारी आणि रेणुका माता मंदिराचे अध्यक्ष भूषण पाटील प्रमुख पाहुणे म्हणून उपस्थित होते.
कार्यक्रमात मंत्री संजय सावकारे, रजनी सावकारे यांच्या हस्ते श्री महालक्ष्मीची आरती झाली.यावेळी ब्राह्मण संघ भुसावळतर्फे मंत्री सावकारे यांचा शाल-श्रीफळ व स्वातंत्रवीर सावरकरांचा पुतळा देऊन सत्कार केला. तसेच अतिवृष्टीमुळे संकटात सापडलेल्या शेतकर्‍यांना मदत म्हणून 11 हजार 111 रुपयांचा धनादेश मुख्यमंत्री सहायता निधीसाठी प्रदान करण्यात आला.
कार्यक्रमात यावेळी मान्यवरांचा गौरव करण्यात आला. सचिव महेंद्र गोडबोले यांनी प्रास्ताविक केले,तर अध्यक्ष गणेश वढवेकर यांनी ब्राह्मण संघाच्या विविध उपक्रमांची माहिती दिली. सत्काराला उत्तर देताना संजय सावकारे म्हणाले, जाती-पातीचे राजकारण बाजूला ठेवून संपूर्ण हिंदू समाजाने एकत्र येऊन पंतप्रधान नरेंद्र मोदी यांच्या स्वदेशी चळवळीला बळ द्यावे. येत्या दिवाळीत प्रत्येकाने स्वदेशी वस्तूंची खरेदी करून देशाच्या प्रगतीत आपला हातभार लावावा. त्यांनी ब्राह्मण संघाने शेतकर्‍यांना केलेल्या आर्थिक मदतीचे कौतुकही केले. सूत्रसंचालन पंकज जोशी आणि अतुल जोशी यांनी केले. प्रसन्न गंधे, डॉ. रमेश जोशी, विजय जोशी, सुनील पाठक, संजय बोचरे आदी कार्यकर्त्यांनी परिश्रम घेतले.
