ऑनलाईन अर्ज भरण्यासाठी 24 तास सुरू राहील आयोगाची साईट : यावल निवडणूक निर्णय अधिकारी मोहनमाला नाझीरकर
यावल नगरपालिका निवडणुकीबाबत नगरपालिकेत पत्रपरिषद
यावल (10 नोव्हेंबर 2025) : यंदाच्या सार्वत्रिक निवडणुकीत उमेदवारी अर्ज भरण्यासाठी सात दिवसांचा अवधी उमेदवारांना मिळणार आहे. उमेदवारांना उमेदवारी अर्ज ऑनलाईन सादर करावा लागणार असून निवडणूक आयोगाची वेबसाईट त्यासाठी 24 तास सुरू राहणार आहे मात्र ही वेबसाईट उमेदवारी अर्ज दाखल करण्याच्या अखेरच्या दिवशी 17 नोव्हेंबर रोजी दुपारी दोन वाजता बंद होईल त्यामुळे या दरम्यान केव्हाही अर्ज दाखल करता येणार असून नंतर त्याची प्रत व मूळ कागदपत्र हे रविवार वगळता 17 नोव्हेंबरपर्यंत दररोज सकाळी 11 ते दुपारी 3 या वेळेत निवडणूक निर्णय अधिकारी स्वीकारतील. प्रत्येक उमेदवाराने निर्धारित वेळेत व मुदतीत आपले बिनचूक अर्ज सादर करावे, असे आवाहन तहसीलदार तथा निवडणूक निर्णय अधिकारी मोहनमाला नाझीरकर यांनी केले. ‘त्या’ यावल नगरपरिषदेमध्ये निवडणुकीच्या पार्श्वभूमीवर घेण्यात आलेल्या पत्रकार परिषदेत बोलत होत्या.
यांची होती उपस्थिती
यावल नगरपरिषद कार्यालयामध्ये तहसीलदार तथा निवडणूक निर्णय अधिकारी मोहनमाला नाझीरकर, यावल पोलिस निरीक्षक रंगनाथ धारबळे यांनी एक संयुक्त पत्रकार परिषद घेतली.
अर्ज भरण्याची प्रक्रिया सुरू
या पत्रकार परिषदेमध्ये तहसीलदार नाझीरकर यांनी सांगितले की, उमेदवारी अर्ज भरायला सोमवारपासून सुरुवात होत आहे. 10 ते 17 नोव्हेंबरपर्यंत उमेदवारी अर्ज भरण्याची मुदत असली तरी रविवारी मात्र कुठल्याही प्रकारचा अर्ज स्वीकारला जाणार नाही. ज्या इच्छुक उमेदवाराला उमेदवारी अर्ज करायचा आहे. त्यासाठी ऑनलाईन निवडणूक आयोगाच्या संकेतस्थळावर 24 तासात ऑनलाईन उमेदवारी अर्ज सादर करता येणार आहे व सादर केलेल्या अर्जाची प्रिंट काढून मूळ कागदपत्र हे सकाळी 11 ते तीन या वेळेत निवडणूक निर्णय अधिकारी यांच्याकडे सादर करता येईल.
पाच लोकांनाच कार्यालयात प्रवेश
निर्धारित वेळेमध्येच प्रत्येक उमेदवाराने आपापले उमेदवारी अर्ज सादर करणे आवश्यक आहे व या संदर्भातील माहिती देण्याकरिता त्यांनी पत्रकार परिषद बोलावली. पत्रकार परिषदेमध्ये माहिती देताना त्यांनी सांगितले की, सार्वत्रिक निवडणुकीच्या संदर्भात सहाय्यक निर्णय निवडणूक निर्णय अधिकारी म्हणून अतुल गांगुर्डे यांची नेमणूक केली आहे. प्रसिद्धी माध्यमांपर्यंत माहिती देण्यासाठी एक स्वतंत्र कक्ष उभारण्यात आला आहे. उमेदवारी अर्ज सादर करण्यासाठी येणार्या उमेदवारासोबत केवळ पाचच लोक यांना कार्यालयात येता येईल. तसेच प्रत्येक उमेदवाराने प्रचार रॅली, भिंतीपत्र, हस्त पत्र व प्रचाराच्या विविध वाहनांच्या परवानगी घेणे आवश्यक आहे. आदर्श आचारसंहितेचे पालन सर्वांनी करावे, असे आवाहन त्यांनी याप्रसंगी केले.
