मनोज जरांगे-पाटील यांच्या हत्येचा कट : धनंजय मुंडेचा निकटवर्तीय कांचन साळवीला अटक
जालना (12 नोव्हेंबर 2025) : मराठा आंदोलक मनोज जरांगे पाटील यांना जीवे मारण्याचा कट रचल्याप्रकरणी राष्ट्रवादी काँग्रेसचे नेते तथा आमदार धनंजय मुंडे यांचा निकटवर्तीय कांचन साळवीला अटक करण्यात आली आहे. साळवीच्या अटकेमुळे जरांगे यांच्या घातपाताच्या कटाचे धागेदोरे नेमके कुठपर्यंत पोहोचले आहेत याचा लवकरच उलगडा होण्याची शक्यता आहे.
अडीच कोटींची दिली होती सुपारी
मराठा आंदोलक मनोज जरांगे पाटील आणि सहकार्‍याची हत्या करण्यासाठी अडीच कोटींची सुपारी देण्यात आलयाचा खुलासा झाला. त्यानंतर राज्यात एकच खळबळ उडाली होती. मनोज जरांगे यांनी काही दिवसांपूर्वी पत्रकार परिषदेत माझ्या हत्येची सुपारी आमदार धनंजय मुंडे यांनी दिल्याचा गंभीर आरोप केला होता. त्यांनी कांचन साळवीचा संबंध अमोल खुणे आणि दादा गरड या दोघांशी असल्याचा दावा केला होता. साळवी हा धनंजय मुंडे यांचा निकटवर्तीय असल्याचाही आरोप त्यांनी केला होता. या आरोपांवर धनंजय मुंडेंनी तत्काळ प्रतिक्रिया देत सर्व आरोप फेटाळले.
रात्री उशिरा चौकशीअंती ठोकल्या बेड्या
या प्रकरणाचा तपास करताना जालना पोलिसांनी काल कांचन साळवीला चौकशीसाठी ताब्यात घेतले होते. प्राथमिक चौकशीत त्याच्या भूमिकेची पुष्टी झाल्यानंतर पोलिसांनी त्याला रात्री उशिरा अटक केली. साळवी हा बीड जिल्ह्यातील रहिवासी असून, तो धनंजय मुंडे यांच्याशी जवळचा असल्याचा दावा आहे. साळवी याला अटक झाल्याने आता या प्रकरणाला नवे वळण मिळाले आहे.
याआधी दोन आरोपींना अटक
कट प्रकरणात गोंदी पोलिसांनी अमोल खुणे आणि विवेक उर्फ दादा गरड या दोघांना गेवराईतून अटक केली होती. कोर्टाने या दोघांना 5 दिवसांची पोलिस कोठडी सुनावली आहे. पोलिस तपासात आता साळवी, खुणे आणि गरड यांच्यातील आर्थिक आणि संवादसंबंधांची सखोल चौकशी होणार आहे.
