Two applications for the post of Mayor and 15 for the post of Corporator were sold in Yawal यावल (12 नोव्हेंबर 2025) : यावल नगरपालिकेच्या सार्वत्रिक निवडणुकीकरिता उमेदवारी अर्ज दाखल करण्याच्या दुसर्‍या दिवशी देखील एकही अर्ज प्रशासनाकडे प्राप्त झाला नाही. नगराध्यक्ष पदाचा जागेसाठी दोन नामनिर्देशन पत्र तर नगरसेवक पदासाठी 15 नामनिर्देशन पत्र हे विक्री झाले. ऑनलाईन आठ उमेदवारांनी नोंदी केल्या असून प्रशासनाकडे मात्र एकही उमेदवारी अर्ज सादर करण्यात आलेला नाही. आता उमेदवारी अर्ज दाखल करण्याकरिता केवळ पाच दिवसाचा अवधी शिल्लक राहिला आहे.
नगरपालिका निवडणुकीसाठी चुरस वाढली
नगरपालिकेच्या सार्वत्रिक निवडणुकीकरिता लोकनियुक्त ओबीसी महिला राखीव जागेसाठी भाजपाकडून रोहिणी फेगडे व दीपाली बारी यांनी तर विविध प्रभागातून नगरसेवक पदाकरिता 15 इच्छुक उमेदवारांनी अर्ज खरेदी केले. नगरपालिका कार्यालयासमोर एक खिडकी योजनेत अनेकांनी विविध राखीव प्रवर्गातून उमेदवारी अर्ज सादर करण्या करीता जात वैधता प्रमाणपत्र मिळवण्याकरिता शिफारससाठी देखील अर्ज दाखल केले आहे.
आठ जणांनी राज्य निवडणूक आयोगाच्या ऑनलाईन संकेतस्थळावर अर्ज सादर केले आहेत. असे असले तरी मुदतीत निवडणूक निर्णय अधिकारी तथा तहसीलदार मोहनमाला नाझीरकर यांच्याकडे एकही उमेदवाराने अर्ज सादर केलेला नाही. एकूणच उमेदवारी अर्ज सादर करण्याच्या दुसर्‍या दिवशी देखील येथे संख्या निरंक होती व आता उमेदवारी अर्ज दाखल करण्याकरिता केवळ पाच दिवसांचा अवधी शिल्लक राहिला आहे.
