भुसावळ (14 नोव्हेंबर 2025) : श्री ज्ञानेश्वर माऊली सांस्कृतिक व बहुउद्देशिय मंडळ, भुसावळद्वारा शहरात 14 ते 17 नोव्हेंबर 2025, शुक्रवार ते सोमवार कार्तीक कृ॥ 11 ते 13 या दरम्यान श्री ज्ञानेश्वर माऊली संजीवन समाधी सोहळ्याचे भव्य आयोजन करण्यात आले आहे. भुसावळात ही परंपरा गेल्या 80 वर्षापासून अखंडपणे अविरत सुरू आहे. ही भुसावळ शहरातील नागरिकांसाठी अभिमानाची बाब आहे. भुसावळकरांचे ज्ञानेश्वर माऊलीविषयी चे प्रेम यातून प्रगट होते.या महोत्सवी सोहळ्यातील प्रमुख आकर्षण म्हणजे 15 ते 17 नोव्हेंबर 2025 या कालावधीत दररोज सायंकाळी सात वाजता पुण्यातील नाथ संप्रदायातील किरण पांडे यांची तीन दिवसीय आध्यात्मिक प्रवचन मालिका आयोजित करण्यात आली आहे.
या विषयांवर होणार प्रवचन
15 रोजी तू मन हे मीचि करी, 16 रोजी माझिया भजनी प्रेम धरी, रोजी सर्वत्र नमस्कारी मज एकाते असे आहेत. कार्यक्रमाचे स्थळ कोळी समाज मंगल कार्याल गजानन महाराज नगर असून 15 नोव्हेंबर रोजी सकाळी 6.30 वा ’श्रीं’ ची प्रतिष्ठापना होईल. यानंतर सात वाजता श्री चिंतामणी गणेश मंडळाचे गणपती अथर्वशीर्ष सहस्त्रावर्तन होईल. या तीन दिवसांच्या कालावधीत दररोज सकाळी 9 ते 11.30 या वेळेत ‘श्री अभंग ज्ञानेश्वरी (संक्षिप्त)’ चे सामूहिक पारायण होईल.
दुपारी 2 ते 5 या वेळेत दत्तभजनी मंडळ, गुरुसेवा भजनी मंडळी, सरस्वती भजनी मंडळ, बलभद्र भजनी मंडळ, गुरुदत्त भजनी मंडळ,आनंदी ग्रुप भजनी मंडळाचे भजन गायन होईल. दररोज सायंकाळी सात वाचता प्रवचने होतील. या शिवाय 17 नोव्हेंबर रोजी सकाळी 6.30 वाजता ज्ञानेश्वरांच्या समाधी काळाचे सामूहिक अभंग वाचन, त्यानंतर दुपारी 12 ते अडीचपर्यंत महाप्रसाद वितरीत होईल.
14 नोव्हेंबर रोजी दुपारी 3.30 वाजता माऊलींची समाधी पूर्व दर्शन पालखी पंचमुखी हनुमान मंदीर, जळगाव रोड, जुना सातारा, कोळी वाडा, रामदेव मंदिर या भागातून निघेल. प्रतिदिनी जप व हरीनाम संकीर्तनन होईल. तरी या सर्व सोहळ्याचा भाविकांनी अवश्य लाभ घ्यावा, असे आवाहन मंडळाचे अध्यक्ष, श्री भानुदास पाटील, उपाध्यक्ष सुरेश चौधरी, सचिव प्रा.डॉ.रमेश जोशी, एफ.आर.पाटील, राजेंद्र देवभानकर, दिलीप झोपे, नीलकंठ बढे, संजय फिरके, रत्नाकर
केर्‍हाळकर, मनोहर महाजन आदींनी केले आहे.
