RPF arrests mobile thief in Bhusawal भुसावळ (15 नोव्हेंबर 2025) : भुसावळ रेल्वे स्टेशनवर रेल्वे सुरक्षा दलाच्या सीपीडीएस पथकाने ऑपरेशन यात्री सुरक्षा अंतर्गत प्रभावी कारवाई करून मोबाईल चोरीत गुंतलेल्या संशीतास रंगेहाथ पकडले. वाढत्या प्रवासी गर्दीच्या पार्श्वभूमीवर स्टेशनवरील संशयित हालचालींवर लक्ष ठेवत असताना ही कारवाई करण्यात आली.
संशय येताच आवळल्या मुसक्या
मंगळवार, 11 रोजी सायंकाळी पाच वाजेच्या सुमारास स्टेशन परिसरातील साऊथ साइड पार्किंगजवळ एक युवक संशयास्पद रीतीने फिरताना आरपीएफ महेंद्र कुशवाहा, इमरान खान आणि सीआयबीचे कपिल कुमार यांच्या पथकाला दिसला. पथकाने त्याला थांबवून विचारपूस केली असता समाधानकारक उत्तर न मिळाल्याने त्याला रेल्वे स्टेशनवरी आरपीएफ ठाण्यात आणून अधिक चौकशी केली, उपनिरीक्षक धर्मेंद्र तिवारी यांच्या उपस्थितीत पंचनामा करताना संशयीत सादिक न्याज अली (30, रा. इमामवाडा, गौसिया नगर, भुसावळ) याच्या जवळून दोन मोबाईल फोन मिळून आले. त्यांची एकूण किंमत सुमारे 43 हजार रुपये इतकी आहे.
पुढील चौकशीत सादिकने यातील एक मोबाईल फोन काही दिवसांपूर्वी भुसावळ स्टेशनच्या प्लॅटफॉर्म तीन वर उभी असलेल्या गाडीतून प्रवाशाच्या अनुपस्थितीचा फायदा घेऊन चोरल्याची कबुली दिली. त्यानंतर संशयीतासह जप्त केलेले मोबाईल फोन पुढील कार्यवाहीसाठी भुसावळ लोहमार्ग पोलिसांकडे सोपविले. तपासात संबंधित मोबाईल चोरीचा असल्याचे निष्पन्न झाले आहे.
