भुसावळ पालिका निवडणूक : महाविकास आघाडी आज नगराध्यक्ष पदाचा उमेदवार जाहीर करणार !
गणेश वाघ
Bhusawal Municipal Election: Mahavikas Aghadi will announce the candidate for the post of Mayor today! भुसावळ (16 नोव्हेंबर 2025) : भुसावळ नगरपालिका निवडणुकीचा आखाडा तापला असलातरी महाविकास आघाडीकडून नगराध्यक्ष पदाचा उमेदवार कोण असेल? हे जाहीर करण्यात आले नव्हते मात्र माजी आमदार संतोष चौधरींनी सर्व सामाजिक गणितांवर आधारीत उमेदवार जाहीर करण्याची घोषणा करीत सहा इच्छूकांची नावेही सांगितली होती. उमेदवाराच्या नावाचा सन्पेस्स आज संपणार असून रविवार, 16 रोजी दुपारी चार वाजता महाविकास आघाडी उमेदवाराचे नाव जाहीर करणार असल्याची माहिती सूत्रांनी दिली.
चौधरींनी थेट इच्छूकांची नावेच सांगितली
काही दिवसांपूर्वी माजी आमदार संतोष चौधरी यांनी शनी मंदिरातील कार्यालयात झालेल्या पत्रकार परिषदेत पक्षातील कार्यकर्ते व पदाधिकार्‍यांशी चर्चा करून 15 रोजी एका उमेदवाराचे नाव जाहीर करण्याचे सुतोवाच केले होते. आमच्याकडे गायत्री रूपचंद भंगाळे, स्वाती कुणाल जंगले, उषा मनोहर तायडे, अ‍ॅड.प्रगती उल्हास पगारे, शोभा रामदास सावकारे इच्छूक असून त्यातील एकाच्या नावावर निश्चिती केली जाईल, असे सूतोवाच केले होते.
इच्छूकांपैकी संधी की ऐन वेळी दुसरे नाव समोर येणार ?
महाविकास आघाडी सहा इच्छूकांपैकी एकाला संधी देणार की ऐनवेळी दुसर्‍या उमेदवाराचे नाव जाहीर करून आश्चर्याचा धक्का देणार ? याकडे शहरवासीयांचे लक्ष लागले आहे.
काँग्रेसची भूमिका एकला चालो रे…!
महाविकास आघाडीतील घटक पक्ष काँग्रेसने महाविकास आघाडीकडे 10 ते 15 जागांची मागणी केली आहे व समाधानकारक जागा न मिळाल्यास नगराध्यक्षपदासाठी तूल्यबळ उमेदवार देवून 35 वर जागांवर उमेदवार उभी करण्याची तयारीही चालवली आहे मात्र वाटाघाटी झाल्यास महाविकास आघाडी आणखी मजबूत होणार आहे.
अजित पवार गटाच्या भूमिकेकडे लक्ष
राष्ट्रवादी अजित पवार गटाची भुसावळ पालिका निवडणुकीची भूमिका अद्याप समोर आलेली नाही. मंत्री माणिकराव कोकाटे यांनी स्थानिक स्तरावरील युतीचा निर्णय जिल्हाध्यक्ष उमेश नेमाडे घेतील? असे सुतोवाच केले होते. या अनुषंगाने अजित पवार गट महायुतीसोबत जाणार की स्वतंत्र लढणार? याकडे शहरवासीयांचे लक्ष लागले आहे.
