Jayant Patil clearly said; Don’t hand over the city to goons and thugs. सांगली (16 नोव्हेंबर 2025) : सांगलीच्या उरुण ईश्वरपूर नगरपरिषद निवडणुकीत प्रचाराच्या शुभारंभप्रसंगी राष्ट्रवादी काँग्रेस शरद पवार गटाचे आमदार जयंत पाटील यांनी गुंड व मोका लागलेल्यांच्या हाती शहर सोपवू नका, असे विधान करीत लक्ष वेधले. उरुण ईश्वरपूर नगर परिषदेसाठी महायुतीकडून गुंड, मोका लागलेल्या लोकांना उमेदवारी दिली जात असल्याचा अप्रत्यक्ष आरोप यावेळी त्यांनी केला.
नगर परिषद नगराध्यक्षपदासाठी राष्ट्रवादीचे उमेदवार आनंदराव मलगुडे यांचा उमेदवारी अर्ज दाखल करण्यात आला. त्यावेळी निवडणुकीच्या प्रचाराचा शुभारंभ पार पडला. यावेळी जयंत पाटलांनी महायुतीवर जोरदार टीका केली.
जयंत पाटील यांचा बालेकिल्ला असणार्‍या ईश्वरपूरमध्ये त्यांच्याविरोधात महायुती एकवटल्याचं चित्र आहे. त्यासाठी भाजपने मोठ्या प्रमाणात ताकद लावली आहे. त्यावरुनच जयंत पाटलांनी महायुतीवर टीका केली. ईश्वरपूर शहराला गुंड आणि मोका लागलेल्या लोकांचा विळखा पडू नये याची खबरदारी ईश्वरपुरकर घेतील, असं जयंत पाटील म्हणाले.
दिवंगत माजी नगराध्यक्ष अशोकराव पाटील यांचे सुपुत्र आणि भाजपचे माजी नगरसेवक विक्रम पाटील यांचे बंधू महेश पाटील तसेच माजी नगरसेवक विजय कुंभार यांनी भाजपला रामराम करत जयंत पाटलांच्या नेतृत्वामध्ये राष्ट्रवादी काँग्रेस पार्टी शरदचंद्र पवार गटात प्रवेश केला. भाजपाच्या या दोन निष्ठावंतांच्या प्रवेशाने ईश्वरपूर शहराचे राजकारण कमालीचे फिरल्याचं चित्र आहे.
