भुसावळात पालिका निवडणूक : निवडणुकीत सहभागी 1200 कर्मचार्‍यांना गुरुवारी ईव्हीएम प्रशिक्षण
भुसावळ (17 नोव्हेंबर 2025) : भुसावळ पालिका निवडणूक प्रक्रिया सुरळीत पार पडावी आणि मतदान केंद्रांवरील तांत्रिक अडचणी कमी व्हाव्यात यासाठी प्रशासनाकडून कर्मचार्‍यांना गुरुवार, 20 व 27 रोजी ईव्हीएम मशीनचे प्रशिक्षण वर्ग देण्यात येणार आहे. पहिला प्रशिक्षण वर्ग 20 नोव्हेंबर, तर दुसरा 27 नोव्हेंबर रोजी शहरातील नाहाटा महाविद्यालयात घेण्यात येणार आहे. दोन्ही प्रशिक्षण वर्ग सकाळी 9 वाजेपासून सुरुवात होणार आहे. यावेळी कर्मचार्‍यांना मार्गदर्शन आणि ईव्हीएम मशीन हाताळणीचे सुध्दा प्रशिक्षण दिले जाणार आहे.
1200 कर्मचारी नियुक्त
भुसावळातील पु.ओं.नाहाटा महाविद्यालयात होणार्‍या या प्रशिक्षण वर्गात ईव्हीएम मशीनचे योग्य पद्धतीने वापर, मतदान प्रक्रियेदरम्यान करावयाची नोंद, मशीन सीलिंग, मॉक पोलिंग आणि निकाल नोंदविण्याच्या पद्धती यावर सविस्तर मार्गदर्शन केले जाईल. निवडणूक प्रक्रियेसाठी 1200 कर्मचारी लागणार आहे. त्या दृष्टीने प्रशासनाकडून 1200 कर्मचार्‍यांची यादी तयार केली आहे. त्यांना प्रशिक्षण आणि निवडणूकीच्या कामाच्या ऑर्डर देण्यात आल्या आहे. त्यामुळे कर्मचारी यंत्रणा सज्ज झाली आहे. मतदानाच्या आदल्या दिवशी आणि मतदानाच्या दिवशी कर्मचारी आणि मतदान यंत्रे मतदान केद्रावर पोचविण्यासाठी वाहनांचे नियोजन करण्यात आले आहे. आरटीओच्या माध्यमातून ही वाहने उपलब्ध केली जाणार आहे. असे सूत्रांनी सांगितले.
निवडणुकीसाठी प्रशासन होतेय सज्ज
निवडणुकीचा कार्यक्रम जाहीर झाल्यानंतर निवडणूक आचारसंहिता लागू झाली आहे. त्यामुळे शहरातील विविध विभागीय अधिकारी, कर्मचारी यांना स्वतंत्र जबाबदार्‍या देण्यात आल्या आहेत. मतदानाच्या दिवशी सर्व केंद्रांवर आवश्यक सुविधा, सुरक्षेची व्यवस्था, मतदान कर्मचार्‍यांची नेमणूक, तसेच निकालाच्या दिवशी मतमोजणी केंद्रावर तांत्रिक सहाय्य यासाठी प्रशासन सज्ज आहे. मत पत्रिका छापण्याचे नियोजन केले आहे.
निवडणूक निर्णय अधिकारी जितेंद्र पाटील यांनी सांगितले की, ईव्हीएम सिलींग, प्रशिक्षण आणि केंद्रनिहाय नियोजन हे तीन टप्पे अत्यंत महत्वाचे आहेत. प्रशिक्षण घेतलेल्या कर्मचार्‍यांमुळे मतदानाच्या दिवशी प्रक्रिया अधिक पारदर्शक आणि सुरळीत पार पडेल.
