BJP smashes office bearers : Shinde group boycotts cabinet meeting मुंबई (18 नोव्हेंबर 2025) : मंत्री मंडळाची मंगळवारी बैठक बोलावण्यात आली मात्र या बैठकीवरच भाजपवर मित्रपक्षांचे पदाधिकारी फोडण्याचा आरोप करीत शिंदे गटातील मंत्र्यांनी बहिष्कार टाकला. ऐन स्थानिक स्वराज्य संस्थांच्या निवडणुकीच्या तोंडावर राज्याचे राजकारण तापले आहे.
शिवसेनेच्या मंत्र्यांचा बैठकीवर बहिष्कार
राज्यात सध्या नगरपरिषद व नगरपंचायत निवडणुकीची रणधुमाळी सुरू आहे. त्यात स्थानिक पातळीवर वेगवेगळे राजकीय समीकरणे अस्तित्वात येत आहेत. त्यातच भाजपकडून मित्रपक्षांचे पदाधिकारी पळवण्याचा प्रयत्न सुरू झाला आहे. त्यावरून सत्ताधारी महायुतीच्या गोटात प्रचंड धुसफूस सुरू झाली आहे. या प्रकरणी उपमुख्यमंत्री एकनाथ शिंदे यांच्या नेतृत्वातील सत्ताधारी शिवसेना प्रचंड नाराज आहे. या नाराजीतूनच शिवसेनेच्या मंत्र्यांनी आजच्या मंत्रिमंडळ बैठकीवर कथितपणे बहिष्कार टाकल्याचे बोलले जात आहे.
मुंबईसह उपगनरात आता परवडणार्‍या दरात घरे
मुख्यमंत्री देवेंद्र फडणवीस यांच्या नेतृत्वातील सरकारने आज बृहन्मुंबई उपनगरातील 20 एकर किंवा त्याहून अधिक क्षेत्रफळावरील म्हाडाच्या गृहनिर्माण प्रकल्पांचा पुनर्विकास करण्यासंबंधीचे धोरण निश्चित केले. सरकारच्या या निर्णयामुळे मुंबई व उपनगरांत मोठ्या प्रमाणात परवडणारी घरे उपलब्ध होण्याचा मार्ग मोकळा झाला आहे. सरकारने आजच्या बैठकीत आयकॉनिक शहर विकासासाठी धोरणही जाहीर केले आहे.
मुख्यमंत्र्यांकडेच व्यक्त केली नाराजी
आजच्या प्री-कॅबिनेटला शिवसेनेचे सर्व मंत्री उपस्थित होते. पण त्यानंतर झालेल्या कॅबिनेटला एकनाथ शिंदे वगळता शिवसेनेचा एकही मंत्री पोहोचला नाही. मंत्रिमंडळाच्या बैठकीनंतर या सर्व नेत्यांनी मुख्यमंत्री देवेंद्र फडणवीस यांच्या दालनात जाऊन त्यांची भेट घेतली. त्यात त्यांनी भाजपकडून मित्रपक्षांचे पदाधिकारी फोडण्यात येत असल्याच्या प्रकारावर तीव्र नाराजी व्यक्त केली.
फडणवीसांनी शिंदेंपुढेच त्यांच्या मंत्र्यांना झापले
तुम्ही उल्हासनगरमध्ये या प्रकाराची सुरुवात केली. तुम्ही जे केले ते आम्ही चालवून घ्यायचे आणि भाजपने केले तर ते चालणार नाही असे अजिबात चालणार नाही, असे मुख्यमंत्र्यांनी शिंदेंच्या मंत्र्यांना सुनावल्याची माहिती आहे. यापुढे एकमेकांचे नेते, पदाधिकार्‍यांना प्रवेश देऊ नका. दोन्ही पक्षांनी या प्रकरणी पथ्य पाळावीत. तुम्ही पथ्य पाळणार असाल तर भाजपही पथ्य पाळेल, असेही मुख्यमंत्र्यांनी यावेळी त्यांना सुनावले. हा प्रकार घडला त्यावेळी स्वतः एकनाथ शिंदे हजर होते त्यामुळे या प्रकाराची आज दिवसभर मंत्रालय परिसरात चर्चा सुरू होती.
