भुसावळ (22 नोव्हेंबर 2025) : पालिका निवडणुकीच्या तयारीला वेग आला असून 28 नोव्हेंबर रोजी भुसावळ तहसील कार्यालयाच्या गोदामात मतदानासाठी वापरण्यात येणार्‍या ईव्हीएम मशीनचे सिलींग करण्याची प्रक्रिया पार पडणार आहे.
उमेदवारांच्या उपस्थितीत सिलिंग
निवडणूक आयोगाच्या दिशानिर्देशांनुसार ही सर्व कामे अत्यंत पारदर्शक पद्धतीने केली जाणार आहेत. याच पार्श्वभुमीवर मतदानासाठी आवश्यक असलेली कंट्रोल युनिट, बॅलेट युनिट ईव्हीएम मशिन्सची तपासणी करून अधिकृत पंचनामा करण्यात येणार आहे. उमेदवारांचे प्रतिनिधी उपस्थित असताना मशीनचे सील लावून सुरक्षितपणे गोदामात ठेवण्यात येईल. यावेळी सर्व प्रक्रिया सीसीटीव्हीच्या देखरेखीखाली पार पडणार असल्याची माहिती प्रशासनाकडून देण्यात आली.
निवडणूक निर्णय अधिकारी जितेंद्र पाटील यांच्या मार्गदर्शनाखाली संपूर्ण तांत्रिक आणि प्रशासकीय तयारी करण्यात आली आहे. मतदान प्रक्रियेदरम्यान कोणतीही तांत्रिक अडचण येऊ नये यासाठी मागील काही दिवसांपासून मतदान कर्मचार्‍यांना मशीन हाताळणीचे प्रशिक्षणही देण्यात आले आहे.
सिलींगनंतर मशीन मतदानापूर्वीच नियुक्त मतदान केंद्रांवर कडक सुरक्षा व्यवस्थेत पाठवण्यात येणार आहेत. आगामी निवडणूक सुरळीत आणि पारदर्शक व्हावी यासाठी प्रशासनाकडून सर्वतोपरी तयारी पूर्ण असल्याचे सूत्रांनी सांगितले. भुसावळ तहसील कार्यालयात ईव्हीएम मशीनचे सिलींग केले जाणार आहे.
