Five devotees die after speeding cruiser hits tractor धाराशिव (22 नोव्हेंबर 2025) : भरधाव क्रुझर ट्रॅक्टरवर धडकल्यानंतर झालेल्या अपघातात नळदुर्ग येथे देवदर्शनाला जाणार्‍या पाच भाविकांचा मृत्यू झाला. जीपचे टायर फुटल्यामुळे ही दुर्घटना घडली. या घटनेत इतर आठ जण गंभीर जखमी झालेत. त्यापैकी काहींची प्रकृती चिंताजनक असल्यामुळे मृतांचा आकडा वाढण्याची भीती आहे.
असा घडला अपघात ?
धाराशिव जिल्ह्यातील सोलापूर – हैदराबाद महामार्गावरून शनिवारी सकाळी एक क्रूझर जीप भरधाव वेगात जात होती. या गाडीतील प्रवाशी सोलापूरहून नळदुर्ग येथे देवदर्शनासाठी जात होते. ही क्रूझर धाराशिवच्या अणदूर परिसरात आली असताना अचानक तिचे टायर फुटले. यामुळे चालकाचे वाहनावरील नियंत्रण सुटून क्रूझर रस्त्यात उभ्या असणार्‍या एका ट्रॅक्टरला धडकली. त्यानंतर ती रस्त्यावरच उलटली. या घटनेत पाच जणांचा जागीच मृत्यू झाला. मृतांत तीन महिलांचा समावेश आहे. क्रूझरमधील इतर आठ जणही या अपघातात गंभीर जखमी झालेत. त्यांना उपचारासाठी सोलापूर स्थित शासकीय रुग्णालयात हलवण्यात आले आहे.
