प्रलंबित गुन्ह्यांच्या तपासाला गती द्या : भुसावळात पोलिस अधीक्षक डॉ.महेश्वर रेड्डींच्या सूचना
भुसावळ (23 नोव्हेंबर 2025) : भुसावळ तालुका पोलीस स्टेशनची वार्षिक तपासणी जिल्हा पोलिस अधीक्षक महेश्वर रेड्डी यांनी केली. पोलिस ठाण्यातील प्रलंबित गुन्हे लवकरत काढावे, तपासावरील गुन्ह्यांना गती द्यावी, अश्या सूचना अधीक्षक रेड्डी यांनी दिल्या. शनिवारी सकाळी तपासणीदरम्यान त्यांनी प्रथम पोलिस पाटीलांची बैठक घेऊन पोलिस ठाण्याच्या हद्दीतील विविध गावातील गुन्हेगारी परिस्थिती, मनुष्यबळाची उपलब्धता, गावस्तरावरील सतर्कता आणि शेतकरी-नागरिकांच्या सुरक्षेच्या उपाययोजनांबाबत माहिती जाणून घेतली.
रेकॉर्डची केली तपासणी
यावेळी त्यांनी पोलिस स्टेशनमधील विविध रेकॉर्डची तपासणी केली. यात मुद्देमाल नोंदी, गोपनीय कागदपत्रे, गाववारी तपासणी नोंदी, चालू तपासातील प्रकरणे आणि गंभीर गुन्ह्यांवरील प्रगतीचा त्यांनी सखोल आढावा घेतला. स्टेशनच्या स्वच्छता, शिस्त, कागदपत्रांची मांडणी व कामकाजातील नियमितता याबाबत त्यांनी समाधान व्यक्त केले. या भेटीदरम्यान डीवायएसपी संदीप गावित उपस्थित होते. तालुका पोलीस ठाण्याचे निरीक्षक महेश गायकवाड यांनी ठाण्यातील विविध शाखा,बीट प्रणाली, ताबा कक्ष, गुन्हे शाखा आणि विविध कार्यालयीन विभागांची पाहणी करून अधीक्षक रेड्डी यांना कामकाजाची प्रत्यक्ष माहिती दिली.
अंमलदारांच्या अडचणीही ऐकल्या
अधीक्षक रेड्डी यांनी महिला व बालकांवरील गुन्हे, प्रतिबंधात्मक कारवाई, तपासाखालील गुन्ह्यांतील प्रगती यांची माहिती घेतली. तपासाची गती वाढवणे, नागरिकांशी संवाद अधिक प्रभावी ठेवणे, गस्त व्यवस्था मजबूत करणे आणि स्थानिक समस्यांवर त्वरीत लक्ष देणे याबाबत त्यांनी अंमलदारांना आवश्यक सूचना केल्या. पोलिस अंमलदारांचा दरबार घेऊन त्यांनी त्यांच्या अडचणीही ऐकून घेतल्या. एकूणच तालुका पोलीस ठाण्याचे काम समाधानकारक असून, नागरिकांसाठी अधिक चांगली सेवा देण्यासाठी टीमवर्क कायम ठेवण्याचे आवाहन त्यांनी केले.
