शिंदे म्हणाले ; अहंकाराने लंका जळाली ; फडणवीस म्हणाले, दुर्लक्ष करा, आपण तर रामाचे अनुयायी
मुंबई (26 नोव्हेंबर 2025) : राज्यातील महायुती सरकारमध्ये सहभागी मंत्र्यांमध्येच कलगीतुरा पेटल्याचे चित्र समोर आले आहे. मुख्यमंत्री देवेंद्र फडणवीस व उपमुख्यमंत्री एकनाथ शिंदे यांच्यातील सुप्त संघर्ष निवडणुकीच्या निमित्ताने समोर आला असून नेत्यांची भाषा आता थेट लंकादहन आणि अंहकारापर्यंत पोहोचली आहे. अहंकाराविरोधात एकत्र आलो असून याच अहंकारामुळे रावणाची लंकी जळाली, असे एकनाथ शिंदे म्हणाल्यानंतर आपण लंकेत राहत नाही, त्याकडे दुर्लक्ष करा, असे म्हणत देवेंद्र फडणवीसांनी टोला लगावला.
पालघरमध्ये संघर्ष टोकाला
पालघरमध्ये नगरपालिकेत भाजप विरुद्ध शिवसेना अशी थेट लढत आहे. भाजपविरोधात या ठिकाणी शिंदेंच्या शिवसेनेच्या पाठीशी इतर सर्व पक्ष एकवटले आहेत त्यामुळे शिंदेसेना आणि भाजपमधील शाब्दिक वार आता अधिक तीव्र होताना दिसतंय.
पालघरमधील सभेत बोलताना एकनाथ शिंदे यांनी भाजपवर टीका केली होती. अहंकार तर रावणामध्येही होता. अहंकारामुळे रावणाची लंका जळून खाक झाली असं शिंदे म्हणाले होते.
त्याला देवेंद्र फडणवीसांनी उत्तर दिलं. कुणी काय म्हणतंय त्याकडे लक्ष देऊ नका. आपण तर लंकेत राहत नाही, आपण रामाचे अनुयायी आहोत असं फडणवीस म्हणाले.
भाजप नेते आणि शिंदेंचे पारपंरिक शत्रू गणेश नाईक हे पालघरचे पालकमंत्री आहेत त्यामुळे शिंदेंच्या वक्तव्याला चांगलीच धार चढलेली पाहायला मिळाली. त्यामुळे फडणवीसांनीही चांगलाच वचपा काढल्याचं दिसून आलं.
एकनाथ शिंदे यांच्या वक्तव्याचा समाचार घेताना गणेश नाईकांनी त्यांच्यावर टीका केली. दुसर्‍याला कमी लेखून मोठं होता येत नाही असं ते म्हणाले तर भारतीय जनता पक्षाची ताकद जास्त असल्याने आपल्या विरोधात सर्व विरोधक एकवटले आहेत, मतदारांनी त्यांना उत्तर द्यावं, असे प्रदेशाध्यक्ष रवींद्र चव्हाण म्हणाले.
