बारामती (27 नोव्हेंबर 2025) : कामावर मत मागण्याऐवजी आता पैशाचे आश्वासन देण्याची स्पर्धा सुरू असून र्थकारणाच्या जोरावर निवडणुका जिंकण्याचा हा चुकीचा प्रवास आहे, अशा तीव्र शब्दात बारामतीत पत्रकारांशी संवाद साधताना शरद पवार यांनी टीका केली.
ते म्हणाले की, ओबीसी आरक्षणावर लवकरच सर्वोच्च न्यायालयाचा निकाल येणार असून त्याची दिशा अद्याप स्पष्ट नाही. नैसर्गिक आपत्तीमुळे कोलमडलेल्या शेतकर्‍यांना दिलेली मदत अपुरी असल्याची टीकाही त्यांनी केली.
राज्यात सध्या महायुतीच्या तीनही पक्षांमध्ये राज्याच्या तिजोरीवर कोणाचे वर्चस्व आहे, यावरून जोरदार संघर्ष रंगलेला आहे. आपल्या मंत्री आणि नेत्यांद्वारे निधी वाटपावरून एकमेकांपेक्षा वरचढ असल्याचे दावे सातत्याने समोर येताना दिसत आहेत. या राजकीय वातावरणावर राष्ट्रवादी काँग्रेसचे संस्थापक शरद पवार यांनी तीव्र नाराजी व्यक्त केली आहे.
राजकारणात मतांसाठी कामे दाखवावी लागतात पण आता उलट परिस्थिती निर्माण झाली आहे. निधी देण्याचे आमिष दाखवून मतं मागितली जात आहेत. हे राजकारण योग्य दिशेत जात नाही, असा थेट इशारा पवार यांनी दिला. ते बारामती येथे प्रसारमाध्यमांशी बोलत होते.
पुढे ते म्हणाले की, या नगरपालिकांच्या निवडणुकांमध्ये फारसं राजकारण आणू नये अशी भूमिका त्यांनी घेतली होती मात्र या वेळी ठिकठिकाणी विचित्र राजकीय समीकरणे दिसत आहेत. एक पक्ष दुसर्‍या पक्षाशी हातमिळवणी करत आहे. याचा अर्थ स्पष्ट आहे महायुतीत एकमत नाही. मतभेद आहेत. पण निर्णय आता जनता देणार त्यामुळे आपण शांतपणे पाहत राहणेच योग्य, असेही ते म्हणाले. महायुतीतील दावे आणि प्रतिदावे राजकीय अस्थिरतेकडे संकेत देत असल्याचे त्यांनी स्पष्टपणे सुचवले.
राजकारणात धक्के आणि नवे वळण
पवारांनी व्यक्त केलेल्या या मतांमुळे राज्याच्या तिजोरीवरून सुरू असलेल्या सत्ताधारी गोंधळात आणखी राजकीय ताप वाढण्याची शक्यता आहे. आर्थिक संसाधनांचा राजकीय वापर, सत्ता टिकवण्यासाठी पैशांचे आमिष आणि महायुतीतील अंतर्गत कुरघोडी यावर पवारांचे वक्तव्य हे थेट वार ठरत आहे.
