‘पोलिस रेझिंग डे’ निमित्त शालेय मुलांनी अनुभवला खाकीचा दरारा व कार्यपद्धती

विद्यार्थ्यांनी याच्या घेतल्या नोंदी
ठाणे अंमलदार यांच्याकडे तक्रार कशी नोंदवली जाते. सीसीटिएनएस संगणकीय प्रणालीद्वारे गुन्ह्यांची नोंद कशी होते.गोपनीय व क्राईम शाखा गुन्हेगारांचा शोध आणि गुप्त माहितीचे संकलन. मुद्देमाल कक्षाचे कामाचे स्वरूप, जप्त केलेली मालमत्ता कशी सुरक्षित ठेवली जाते. वायरलेस विभागातर्फे बिनतारी संदेश यंत्रणेद्वारे संवाद कसा साधला जातो. शस्त्रास्त्रांचे आकर्षण आणि बीएनएसची माहिती देण्यात आली.

विद्यार्थ्यांना आकर्षण
या भेटीचे मुख्य आकर्षण म्हणजे पोलिसांनी वापरली जाणारी शस्त्रास्त्रे. यावेळी विद्यार्थ्यांना विविध रायफल्स, रिव्हॉल्व्हर आणि इतर सुरक्षा साधनांची माहिती देण्यात आली. विशेष म्हणजे, बदललेल्या कायद्यानुसार आता भारतीय न्याय संहिता आणि भारतीय नागरिक सुरक्षा संहिता अंतर्गत पोलीस कशी कारवाई करतात, याची प्राथमिक माहितीही वरिष्ठ अधिकार्‍यांनी विद्यार्थ्यांना सोप्या भाषेत दिली. विद्यार्थ्यांनी हत्यारांना हात लावून आनंद घेतला.

विद्यार्थ्यांच्या प्रतिक्रिया
आजवर केवळ चित्रपट किंवा बातम्यांमध्ये पाहिलेले पोलीस ठाणे जवळून पाहता आल्याने विद्यार्थी भारावून गेले होते. पोलीस निरीक्षकांच्या दालनापासून ते कोठडीपर्यंतची माहिती घेताना विद्यार्थ्यांनी अनेक शंकाही विचारल्या, ज्यांचे पोलिसांनी आनंदाने निरसन केले. यावेळी वाहतूक शाखेच्या नियमांची सुध्दा विद्यार्थ्यांना वेळी माहिती देण्यात आली.

विद्यार्थी हे भविष्यातील सुजाण नागरिक
विद्यार्थ्यांच्या मनात पोलिसांबद्दल असलेली भीती दूर होऊन मैत्रीचे नाते निर्माण व्हावे, हा या उपक्रमाचा मुख्य हेतू आहे. भविष्यातील सुजाण नागरिक म्हणून त्यांना कायद्याचे भान असावे, यासाठी आम्ही त्यांना पोलीस दलाच्या कार्यपद्धतीचे प्रात्यक्षिक दाखवल्याचे शहर निरीक्षक उध्दव डमाळे म्हणाले.