राज्यात युती जळगावात कुस्ती ! कंत्राट वादातून पोलिस ठाण्याबाहेरच दोन गटात राडा

Alliance at the State Level, Brawl in Jalgaon ! Two Factions Clash Right Outside Police Station Over Contract Dispute. जळगाव (15 मार्च 2026) : राज्यातील सत्तेत शिवसेना व भाजपा भाऊ-भाऊ असलेतरी जळगावात मात्र याच भाऊबंदकीत महापालिकेच्या कंत्राट वादातून जोरदार राडा झाला. विशेष म्हणजे पोलिस ठाण्याबाहेरच झालेल्या तुंबळ हाणामारीने जळगावातील राजकीय वर्तुळात विविध चर्चांना उधाण आले. शनिवारी दुपारी जळगाव महापालिकेच्या एका कंत्राटाच्या वादातून भाजप आणि शिवसेनेचे कार्यकर्ते थेट पोलिस ठाण्यातच एकमेकांना भिडल्याने मारहाणीत भाजपचे नगरसेवक कल्पेश सोनवणे आणि माजी नगरसेवक कैलास सोनवणे जखमी झाले. परिस्थिती नियंत्रणात आणण्यासाठी पोलिसांना सौम्य लाठीमार करावा लागला.

काय घडले जळगावात ?
महापालिकेच्या एका निविदेवरून भाजपचे नगरसेवक कल्पेश सोनवणे आणि शिवसेनेचे राहुल ठाकरे यांच्यात गेल्या काही दिवसांपासून धुसफूस सुरू होती. शनिवारी दुपारी दोनच्या सुमारास बालाजी पेठ भागात दोन्ही गट समोरासमोर आले. तिथेच दोन्ही गटांमध्ये शाब्दिक चकमक होऊन वादाला सुरुवात झाली. हा वाद इतका विकोपाला गेला की, दोन्ही गटात रस्त्यावरच हाणामारी झाली. या घटनेनंतर दोन्ही बाजूचे लोक तक्रार देण्यासाठी शनिपेठ पोलिस ठाण्यात पोहोचले.