भुसावळात जागतिक आदिवासी दिन उत्साहात : महिलांचा सक्रिय सहभाग ठरला कार्यक्रमाचे वैशिष्ट्य
आदिवासी क्रांतिकारक समशेरसिंग पारधी समाज बहुउद्देशीय संस्था व आदिवासी पारधी समाजाचा संयुक्त उपक्रम
भुसावळ (मंगळवार, 11 ऑगस्ट 2026) : जागतिक आदिवासी दिनानिमित्त आदिवासी क्रांतिकारक समशेरसिंग पारधी समाज बहुउद्देशीय संस्था, भुसावळ आणि आदिवासी पारधी समाज यांच्या संयुक्त विद्यमाने विविध उपक्रमांचे आयोजन करून जागतिक आदिवासी दिन उत्साहात साजरा करण्यात आला. या कार्यक्रमाला समाजबांधवांचा उत्स्फूर्त प्रतिसाद मिळाला.
कार्यक्रमाची सुरुवात दीपप्रज्वलनाने करण्यात आली. त्यानंतर मान्यवरांच्या हस्ते प्रतिमापूजन करण्यात आले. आदिवासी समाजाच्या सामाजिक, सांस्कृतिक आणि शैक्षणिक विकासाबाबत यावेळी विचारमंथन करण्यात आले. समाजातील नागरिकांनी एकत्र येऊन आपल्या परंपरा, संस्कृती आणि हक्कांचे जतन करण्याबरोबरच पुढील पिढीच्या विकासासाठी प्रयत्न करण्याचे आवाहन करण्यात आले.
कार्यक्रमात समाजातील विविध मान्यवरांनी मनोगत व्यक्त केले. आदिवासी समाजाच्या एकजुटीचे महत्त्व, समाजातील युवकांनी शिक्षणाकडे गांभीर्याने पाहण्याची गरज तसेच सामाजिक प्रगतीसाठी संघटितपणे काम करण्याची आवश्यकता यावर विचार मांडण्यात आले. संयुक्त आयोजनामुळे समाजातील विविध घटक एकत्र आले. कार्यक्रमाचे विशेष वैशिष्ट्य म्हणजे महिलांनी घेतलेला सक्रिय सहभाग. महिलांनी कार्यक्रमाच्या आयोजनात तसेच विविध उपक्रमांमध्ये उत्स्फूर्त सहभाग नोंदविल्याने कार्यक्रमाला वेगळे स्वरूप प्राप्त झाले. जागतिक आदिवासी दिनाच्या माध्यमातून समाजाची एकजूट, सामाजिक बांधिलकी आणि सांस्कृतिक अस्मिता जपण्याचा संदेश देण्यात आला. कार्यक्रमाच्या यशस्वी आयोजनासाठी संस्थेचे पदाधिकारी व समाजबांधवांनी परिश्रम घेतले.
