युवतींच्या दहीहंडीचा शिवतीर्थावर 5 सप्टेंबरला थरार !

15 संघामधून 685 महिला गोविंदा सहभाग
भंवरलाल ण्ड कांताबाई जैन फाऊंडेशन आणि युवाशक्ती फाउंडेशन यांच्या संयुक्त विद्यमाने आयोजित या उपक्रमात ‘नारीशक्तीचा गजर, दहीहंडीचा थरार’ ही संकल्पना घेऊन आयोजित करण्यात आलेल्या या सोहळ्यात शाळा-महाविद्यालयांच्या 15 संघांमधून तब्बल 685 महिला गोविंदा युवतींच्या धाडसी मानवी मनोर्‍यांचा थरार जळगावकरांना अनुभवता येतील. विशेष म्हणजे सहभागी होणार्‍या प्रत्येक महिला गोविंदाचा 10 लाख रुपयांचा अपघाती विमा आयोजकांकडून उतरविण्यात आला आहे.

63 हजारांची रोख पारितोषिके
मागील वर्षीच्या दहिहंडीच्या समारोपी वेळी जैन इरिगेशनचे अध्यक्ष अशोक जैन यांनी रोख पारितोषिके देण्याचे जाहिर केले होते. त्याची पूर्तता म्हणून यंदाच्या दहिहंडी फोडणार्‍या युवतींना रोख पारितोषिके दिली जाणार आहे. युवतींच्या प्रथम विजेत्या संघाला 31111 रुपये, द्वितीय संघाला 21111 रूपये, तृतीय संघाला 11 हजार 111 रुपये असे एकूण 63 हजार 333 रूपयांची रोख पारितोषिके असतील.

सांस्कृतिक कार्यक्रमांची रेलचेल
दहीहंडीच्या थरारासोबतच कार्यक्रमात विविध आकर्षणांची रेलचेल असेल. ‘शौर्यवीर’ आणि ‘महाबली’ या दोन ढोल पथकांमधील तब्बल 213 ढोलवादक आपल्या दमदार वादनाने वातावरण निर्मिती करतील. यासोबतच मर्दानी खेळ, सांस्कृतिक नृत्य, रिदमिक योगा, लाईव्ह सिंगिंग, स्लाईन डीजे, लेझर शो आणि आकर्षक फटाक्यांची आतषबाजी हे कार्यक्रमाचे विशेष आकर्षण ठरणार आहे. शहरातील 15 रिल्स स्टार युवतीही दहीहंडीच्या उत्सवात सहभागी होणार असून, त्यांच्या सहभागामुळे तरुणाईमध्ये विशेष उत्साहाचे वातावरण निर्माण होणार आहे

नारीशक्तीला ऊर्जादायी साथ : अशोक जैन
‘महाराष्ट्रातील एकमेव युवतींची दहीहंडी’ अशी ओळख निर्माण केलेल्या युवतींच्या सामर्थ्याला व्यासपीठ देण्याचा उद्देश आहे. पारंपरिक सण-उत्सवांमध्ये युवतींचा सक्रिय सहभाग वाढविण्यासोबतच त्यांच्यातील आत्मविश्वास, संघभावना, नेतृत्वगुण, साहस आणि निर्णयक्षमता यांना प्रोत्साहन देण्याचा प्रयत्न या माध्यमातून होत आहे. अनेक क्षेत्रात महिलांनी आपल्या संस्कृतीची शान वाढवली आहे, अशी प्रतिक्रिया उत्सव समितीच्या बैठकीवेळी अशोक जैन यांनी दिली.