आदिशक्ती श्री संत मुक्ताईचे अभिषेकासह पूजन

मुक्ताईनगर- आदिशक्ती श्री संत मुक्ताबाईचे घटस्थापनेच्या दिवशीच जन्म दिवस असल्याने रविवारी पहाटे पाच वाजता संस्थानचे अध्यक्ष अॅड.रवींद्र पाटील यांच्याहस्ते अभिषेक व पूजन करण्यात आले. प्रसंगी हभप रवींद्र हरणे, उद्धव जुणारे, पुरुषोत्तम वंजारी उपस्थित होते तर दिंडोरी प्रणित श्री स्वामी समर्थ सेवा केंद्राच्या वतीने जुन्या कोथळी येथील तुळजा भवानी मंदिरात सकाळी 10.30 वाजता खासदार रक्षा खडसे यांच्याहस्ते आरती करण्यात आली. तदनंतर पाठ सोहळा प्रारंभापूर्वी नगरसेवक संतोष मराठे यांनी सपत्नीक आरती केली. अब्ज चंडी अंतर्गत भव्य दुर्गा सप्तशती पाठ सोहळा घेण्यात आले. पाठ सोहळ्याला शेकडो महिला व पुरुष सेवेकरी यांनी सेवा रुजू केली. ईश्वर पाटील व डॉ महेंद्र गावंडे यांनी प्रातिनिधिक स्वरूपात पाठ वाचन केले .
यांची होती उपस्थिती
यामिनी चंद्रकांत पाटील, ग्रामपंचायतीच्या माजी सदस्य अनिता शिवाजी मराठे, हभप दुर्गा संतोष मराठे, कल्पना जावळे, संगीता भोलाणे, वैशाली एदलाबादकर, भारती भोई, नीता पाटील, संजना पाटील, प्रियंका पाटील यांच्यासह शेकडो महिला सेवेकरी पाठ सोहळ्यात सहभागी झाल्या.
जे खळांची व्यंकटी सांडो !
तया सत्कर्मी रती वाढो !!
या ब्रीदानुसार प.पू.गुरुमाऊली अण्णासाहेब मोरे यांच्या जगाच्या कल्याणासाठी नवरात्रोत्सव काळात अब्ज चंडी सेवे अंतर्गत वरील सेवेची आज्ञा आहे. त्यात योगायोगाने घटस्थापनेला आदिशक्ती मुक्ताबाई दिवस जन्म दिवस असल्याने सेवेकरी आवर्जून ही सेवा मुक्ताई चरणी देतात.
