अनैतिक संबंधात अडसर ठरणार्या जळगावातील मुलाचा मध्यप्रदेशातील जंगलात खून
प्रियकरासह आईला पोलिसांनी तपासाअंती ठोकल्या बेड्या
जळगाव : अनैतिक संबंधाच्या आड येणार्या 14 मुलाचा आईनेच प्रियकराला सोबत घेत खुन केल्याची संतापजनक घटना शहरात उघडकीस आली आहे. या प्रकरणी दोघा आरोपींना बेड्या ठोकण्यात आल्या आहेत. पुरूषोत्तम उर्फ प्रशांत विलास पाटील (14, रा.सावखेडा शिवार, जलाराम नगर, जळगाव) असे खून झालेल्या मुलाचे नाव आहे तर या प्रकरणी मयताची आई तथा संशयीत आरोपी मंगलाबाई विलास पाटील (35, रा. जलाराम नगर) आणि प्रमोद जयदेव शिंपी (38, रा.विखरण, ता.एरंडोल) यांना अटक करण्यात आली आहे.
जंगलात दिला गळफास
सूत्रांच्या माहितीनुसार, चालक असलेले विलास नामदेव पाटील हे पत्नी मंगला पाटील आणि मुलगा प्रशांत पाटील यांच्यासह जलाराम नगरात वास्तव्याला आहेत. त्यांची पत्नी मंगला पाटील आणि प्रमोद शिंपी यांचे वर्षभरापासून सूत जमले होते. त्यांच्या अनैतिक संबंधांमध्ये मुलगा प्रशांत पाटील हा अडसर ठरत असल्याने त्याची आई मंगलाबाई आणि प्रमोद शिंपी यांनी मुलाला रविवार, 16 जानेवारी रोजी रावेर येथून कबुतर ठेवण्याचा पिंजरा घेवून येवू, असे आमीष दाखवून नेले होते. आरोपी मंगलाबाई व प्रमोद यांनी मध्यप्रदेशातील बर्हाणपूर गावानजीकच्या जंगलात प्रशांत पाटीलला गळफास देवून झाडाला लटकावून दिले. त्यानंतर महिला पुन्हा जळगावात घरी आली.
तपासात उलगडले गुन्ह्याचे गणित
इकडे मुलगा बेपत्ता झाल्याची तक्रार प्रशांतचे वडील विलास पाटील यांनी जळगाव तालुका पोलिस ठाण्यात दिली होती. या प्रकरणी हरविल्याची नोंद करण्यात आली. पोलिसांनी मयत प्रशांतच्या मोबाईलचे कॉल डिटेल तपासले असता प्रमोद शिंपी यांच्या मोबाईलवर वारंवार कॉल केल्याचे दिसून आले. त्यानंतर पोलिसांनी तांत्रिक मदतीने प्रमोद शिंपी आणि मयत प्रशांत पाटीलचे लोकेशन एक असल्याचे दिसून आले. त्यानुसार पोलिसांनी तपासाला सुरूवात केली. पोलिसांनी बुधवार, 26 जानेवारी रोजी दुपारी 2 वाजता संशयित आरोपी प्रमोद जयदेवर शिंपी याची कसून चौकशी केली असता त्याने गुन्ह्याची कबुली दिली. यासाठी मयत प्रशांतची आई मंगलाबाई पाटील याचा सहभाग असल्याचे निष्पन्न झाले. पोलिसांनी दोघांना अटक केली. पोलिसांनी बर्हाणपूर येथील जंगलातील घटनास्थळी जावून मुलाच्या मृतदेहाचा पंचनामा केला.
आरोपींना सुनावली कोठडी
दरम्यान, मुलाचा खून करणार्या दोन्ही संशयीत आरोपींना गुरूवार, 27 जानेवारी रोजी जिल्हा न्यायालयात हजर केले असता दोघांना न्यायालयाने 1 फेब्रुवारीपर्यंत पोलिसस कोठडी सुनावली आहे. या गुन्ह्याच्या तपासकामी पोलिस निरीक्षक रामकृष्ण कुंभार, उपनिरीक्षक नयन पाटील, सहाय्यक फौजदार वासुदेव मराठे, सतीश हाळणोर, भांडारकर यांच्यासह गुन्हे शोध पथकाने परीश्रम घेतले.
