अहमदाबाद : एकाच कुटुंबातील चार जणांची हत्या उघड झाल्याने गुजरातच्या अहमदाबादमध्ये खळबळ उडाली आहे. अहमदाबादमध्ये ओढव नावाच्या भागात ही घटना घडली. दरम्यान, कौटुंबिक वादातून घटना घडल्याचा अंदाज असून संशयीत आरोपी विनोद मराठीनेच पत्नी सोनल मराठी, मुलगी प्रगती, मुलगा गणेश आणि सासू सुभद्राबाई यांचा खून केल्याचा संशय आहे.
दुर्गंधी सुटल्यानंतर घटना उघड
अहमदाबादमध्ये ओढव नावाचा भाग आहे. याच भागात दिव्य प्रभा नावाची सोसायटी आहे. ह्या सोसायटीतल्या एका घरातून दुर्गंध यायला लागला. स्थानिकांना काही तरी काळंबेरं आल्याचा संशय आला. ज्या घरातून दुर्गंध येत होता, त्या घरात रहिवाशांनी, सोसायटीच्या काही पदाधिकार्‍यांनी डोकावण्याचा प्रयत्न केला पण घराला बाहेर कुलूप होतं. पण घरासमोर एकदम सन्नाटा होता. स्थानिकांनी मग सरळ पोलीसांना फोन करुन माहिती दिली. पोलीसांनीही मग वेळ न लावता दिव्यप्रभा सोसायटी गाठली. घराचं कुलूप तोडलं. काही प्रत्यक्षदर्शी सोबत ठेवले. घराचं दार उघडताच आतून दुर्गंधीचा लोट बाहेर आला. मस्तकापर्यंत तो झोंबेल अशी स्थिती होती. पोलीसांनी तसेही आधीच मास्क, रुमाल नाकाला लावलेलेच होते. काही तरी भयंकर घरात घडल्याचा अंदाज पोलिसांना आलाच. त्यातल्या काहींसाठी हा अनुभव नवा नव्हता. घर मोठं होतं. तीन चार दिवसापासून ते उघडलं गेलं नसावं हे आतल्या परिस्थितीवरुन लक्षात येत होतं. पोलीसांनी संपूर्ण घराची तपासणी केली तर त्यांच्या जे डोळ्याला दिसलं त्यानं हादरलेच. घरातल्या वेगवेगळ्या खोलीत एक नाही, दोन नाही तर चार मृतदेह चित्रविचित्र अवस्थेत पडले होते. बहुतांश मृतदेह सडलेही होते. त्यातूनच नाकाला झोंबणारा वास सुटलेला होता.
कुटुंब मराठी असल्याचा अंदाज
पोलीसांनी शोधाशोध घेतल्यानंतर स्थानिकांनी दिलेल्या माहितीनुसार हे एक ‘मराठी’ कुटुंब आहे. म्हणजेच कुटूंब मराठी आहे की त्यांचं आडनाव मराठी आहे याची अजून सविस्तर माहिती नाही. पण कुटुंबातल्या वादातूनच विनोद मराठी ह्या संशयीत आरोपीनंच स्वत:च्या कुटुंबाचा खात्मा केल्याची प्राथमिक माहिती आहे. विनोद मराठीनेच पत्नी सोनल मराठी, मुलगी प्रगती, मुलगा गणेश आणि सासू सुभद्राबाई यांचा खून केल्याचा संशय आहे. पण सध्या तरी विनोद मराठी हा फरार आहे. हे हत्याकांड चार दिवसांपूर्वी झाल्याचा संशय आहे. सर्व मृतदेह पोस्टमार्टमसाठी हलवण्यात आले आहेत.
