शहादा : पिंगाणे (ता. शहादा) शिवारातून काही शेतकऱ्यांचा शेतातून ४८ हजार ७०० रुपयांच्या ठिबक नळ्या व पीव्हीसी पाईप चोरून नेले असून शहादा पोलीस ठाण्यात राजाराम पाटील यांच्या फिर्यादीवरून अज्ञात चोरट्याविरुद्ध गुन्हा दाखल करण्यात आला होता या गुन्ह्यात पोलिसांनी तात्काळ तपास चक्रे फिरवून आरोपी रियाज भिकन पिंजारी (रा. भाजीपीर दर्ग्याजवळ, कुकडेल शहादा) यास अटक करण्यात आली आहे.
गोपनीय माहितीवरुन आरोपी जाळ्यात
शेत शिवारात सध्या खरीपाची लगबग सुरू असून केळी, पपई व कापूस पिकाची लागवड करण्यासाठी बागायतदार शेतकऱ्यांनी तयारी सुरू केली आहे. त्यात भारनियमन व कूपनलिकेला पाणी कमी असल्या कारणाने बहुतांश शेतकऱ्यांनी ठिबक सिंचनाचा वापर सुरू केला आहे. त्यासाठी शेत शिवारात सध्या ठिबक सिंचनाच्या नळ्या व टाकण्याचे काम सुरू आहे यात चोरट्यांनी संधी साधत पिंगाणे (ता. शहादा) येथील युवराज राजाराम पाटील, राजेंद्र बन्सी पाटील, राधाबाई बन्सी पाटील यांसह इतरही शेतकऱ्यांचा शेतातून ठिंबक सिंचनाचा नळ्या व पीव्हीसी पाइप अज्ञात चोरट्यांनी चोरुन नेले. अज्ञात चोरट्याविरुद्ध शहादा पोलीस ठाण्यात गुन्हा दाखल करण्यात आला होता. दरम्यान शेतकऱ्यांची बाब असल्याकारणाने पोलिसांनी तात्काळ तपास चक्रे गतिमान केली यात आरोपी रियाज भिकन पिंजारी (रा. भाजीपीर दर्ग्याजवळ, कुकडेल शहादा) यास अटक करण्यात आली असून पोलिस तपासात त्याने गुन्ह्याची कबुली दिली आहे.
