आई हे जगातील सर्वोच्च विद्यापीठ – प.पू.महामंडलेश्वर जनार्दन हरीजी महाराज
फैजपूर : आई या शब्दात साक्षात ईश्वराचा आत्मा वास करत असून आईसारखे चैतन्य, प्रेम, करूणा, सुसंस्कार जगात कुठेही उपलब्ध होऊ शकत नाहीत. आई प्रेरणा व ऊर्जा यांचा स्रोत असून आपल्या मुलांचीच नव्हे तर समाजाचा उद्धार करण्याची क्षमता आईत असते. एखाद्या व्यक्तीचे जीवन घडवणे हेसुद्धा एक प्रकारचे परमेश्वरी कार्यच आहे. निष्काम भावनेतून समाज, देश व सृष्टीला प्रत्येकाने काहीतरी देत राहिले पाहिजे असे प्रतिपादन परमपूज्य वंदनीय महामंडलेश्वर जनार्दन हरीजी महाराज यांनी व्यक्त केले. मधुर संस्कार केंद्र, यावल व सतपंथ चॅरीटेबल ट्रस्ट, फैजपूर यांच्या संयुक्त विद्यमाने मंगळवार, 24 डिसेंबर रोजी श्री गजानन महाराज मंदिर, विरार नगर, यावल येथे हे मातृवंदना कार्यक्रमाचे आयोजन करण्यात आले.
मातांचा सहृदय सन्मान
पूज्य साने गुरुजींच्या जयंतीचे औचित्य साधून मातृहृदयी स्वर्गीय पी.आर.पाटील सर यांच्या संकल्पनेतून सलग 16 वर्षे मातृवंदनेचा यज्ञ अविरतपणे सुरू आहे. यावेळी समाजातील मातृ प्रेमाचा सन्मान व्हावा व मातृशक्तीचे दर्शन व्हावे यासोबत ज्यांनी अत्यंत प्रतिकूल परीस्थितीत आपल्या पाल्यांना उच्चशिक्षित व सुसंस्कारित केले आणि आज जी मुलं समाजसेवा करीत आहेत अशा 10 प्रातिनिधिक मातांचा सत्कार सोहळा मातृवंदना या कार्यक्रमातून करण्यात आला.
यांची होती उपस्थिती
या कार्यक्रमाच्या अध्यक्षस्थानी सतपंथ मंदिर संस्थानचे गादिपती परमपूज्य महामंडलेश्वर जनार्दन हरीजी महाराज होते. प्रमुख अतिथी म्हणून माजी कुलगुरू डॉ.के.बी.पाटील, सेवानिवृत्त प्रा.कमल पाटील, सत्कारार्थी मातेचा प्रतिनिधी विद्या सुधाकर सिसोदिया यांची उपस्थिती होती. प्रसंगी शशिकला वासुदेव बडे (पाथर्डी, अहमदनगर), केवल ग्यानसिंग पाटील (खडकेसीम, एरंडोल), अलका लक्ष्मण बेंडाळे (सावदा), इंदुमती मंगेश मालखेडे, सुलोचना भीमराव देशमुख (पाळे, नाशिक), रोहिणी रूपचंद पाटील (पुणे), कमल सुरेश चौधरी (मुंबई), आशाबाई सीताराम पारधी (चोपडा), जनाबाई पंढरीनाथ झांबरे (वराडसीम, भुसावळ), शाबेरा मेहमूद तडवी (सौखेडासीम) या मातांचा सन्मानपत्र देऊन सत्कार करण्यात आला.
मातृवंदना सोहळा समाजाला दिशादर्शक -के.बी.पाटील
डॉ.के.बी.पाटील यांनी सद्यस्थितीत समाज स्त्री भ्रूणहत्या, लैंगिक छळ, लिंगभेद अशा समस्येंनी ग्रासला असून अशावेळी मातृवंदना सारखा सोहळा समाजाला दिशादर्शक ठरू शकतो, असे मत व्यक्त केले. यावेळी प्रा.कमल पाटील यांनी ‘मी श्यामची आई बोलतेय’ हा एकपात्री प्रयोग सादर केल्यानंतर उपस्थित सार्‍यांचेच डोळे पाणावले. प्रास्ताविक प्रा.व.पू.होले यांनी केले. त्यांनी स्व.पी.आर.पाटील यांचा जीवन परीचय करून देत अत्यंत हालाखीच्या परीस्थितीत जे सुख स्वतःला नाही लाभले ते इतरांना देण्याची धडपड असंख्य कार्यक्रमांच्या माध्यमातून पी.आर.पाटील हे करीत आहेत आणि हा यज्ञ असाच सुरू राहील अशी ग्वाही दिली. सूत्रसंचालन चतुर चौधरी, प्रा.राजेंद्र राजपूत, प्रा.मधुराणी शिंदे यांनी तर आभार बी.एन.पाटील यांनी मानले. यशस्वीतेसाठी मधुर संस्कार केंद्र परीवाराने परीश्रम घेतले.
