कुर्‍हेपानाचेत भाजपा तालुकाध्यक्षपद निवडीवरून वादंग : माजी मंत्री खडसे व महाजन समर्थकांमध्ये हमरी तुमरी
भुसावळ : तालुक्यातील कुर्‍हेपानाचे येथे गुरुवारी भाजपा तालुकाध्यक्षपदाच्या निवडीप्रसंगी माजी मंत्री महाजन व माजी मंत्री खडसे समर्थकांमध्ये चांगलीच हमरीतुमरी झाल्याने भाजपाच्या अंतर्गत राजकीय गोटात मोठी खळबळ उडाली आहे. दरम्यान, भाजपातील इच्छुकांच्या भाऊगर्दीने भाजपा तालुकाध्यक्षपदासह शहराध्यक्ष पद निवडीचा निर्णय आता कोअर कमेटीकडे सोपवण्यात आला. रावेरातील धुसफूसनंतर आता कुर्‍हेपानाचेत वादंग झाल्याने खळबळ उडाली आहे.
दोघा माजी मंत्र्यांचे समर्थक भिडले
भारतीय जनता पक्षाच्या भुसावळ तालुकाध्यक्षपदाच्या निवडणुकीसाठी कुर्‍हे पानाचे येथे गुरुवारी रेणुका माता मंदिराच्या सभामंडपात पक्षाची बैठक खासदार रक्षा खडसे व आमदार संजय सावकारे यांच्या उपस्थितीत घेण्यात आली.प्रास्ताविक तालुकाध्यक्ष सुधाकर जावळे तर सूत्रसंचालन भालचंद्र पाटील यांनी केले. बैठकप्रसंगी तालुकाध्यक्षपदासाठी वरणगावातील पदाधिकारी फार्म भरीत असतानाच गोटूशेठ चाहेल यांनी दोन दिवसांपूर्वीच वरणगावात निवड झाली असताना वरणगावचे पदाधिकारी येथे कसे? असा प्रश्‍न उपस्थित केल्यानंतर वरणगावचे नगराध्यक्ष सुनील काळे यांनी भुसावळ तालुक्यात वरणगाव शहर येत नाही का? असा प्रश्‍न उपस्थित करीत दोन दिवसांपूर्वी वरणगावात संयोजकांच्या झालेल्या निवडीला स्थगिती देण्याची मागणी केली. आम्हीदेखील भाजपाचे निष्ठावान असून बंदद्वार मोजक्या लोकांसोबत निवड झालीच कशी? असा प्रश्‍न त्यांनी उपस्थित केला. यावेळी वरणगावचा व्यक्ती अध्यक्ष म्हणून नकोच असे काही सदस्यांनी आवाज उठवताच वरणगाव नगराध्यक्ष सुनील काळे व इतर सदस्यांनी आमचा जर कुणी वेगळा अध्यक्ष असेल तर दाखवा नाहीतर आम्ही भाजपाचे नाही हे सिध्द करून दाखवा, आम्ही इथून निघून जातो, असे म्हटल्यानंतर गोंधळ वाढला तर याचवेळी माजी मंत्री खडसे व माजी मंत्री महाजन यांचे समर्थक एकमेकांच्या अंगावर धावल्याने गोंधळ निर्माण झाला. प्रसंगी खासदार व आमदारांनी शांततेचे आवाहन करीत पदाधिकार्‍यांना शांत केले.
निवडीचा चेंडू कोअर कमेटीकडे
यावेळी 16 सदस्यांनी भाजपा तालुकाध्यक्ष पदासाठी अर्ज केला तर सहा सदस्यांनी माघार घेतल्याने उर्वरीत 10 सदस्यांची नावे भाजपाच्या कोअर कमिटीकडे पाठवण्याचा निर्णय खासदार रक्षा खडसे यांनी घेतला. दरम्यान, सुनील नेहते, किरण कळसकर, किरण चोपडे, प्रशांत पाटील, राजू चौधरी, अजय पाटील, रमेश पाटील, नागो पाटील, सुधीर जोहरे यांची नावे भाजपाच्या कोअर कमिटीकडे पाठवण्यात आली आहेत. या बैठकीला जि.प.चे माजी सदस्य तथा जिल्हा नियोजन समितीचे सदस्य समाधान पवार, मनोज बियाणी, मनीषा पाटील, भाजपचे जळगाव जिल्हा संघटक सरचिटणीस प्रा. सुनील नेवे, सरपंच रामलाल बडगुजर, उपसरपंच वासुदेव वराडे, वरणगाव नगराध्यक्ष सुनील काळे, सुधाकर जावळे, दिनेश नेमाडे, डॉ.भावे यांच्या सह तालुक्यातील सरपंच व भाजपा पदाधिकारी उपस्थित होते.
