धरणगाव : सुरत जिल्ह्यातील गंगाधरा येथील माहेर व धरणगाव तालुक्यातील पिंपळे बु.॥ येथील विवाहितेने माहेरून एक लाख रुपये न आणल्याने तसेच तिच्या चारीत्र्यावर संशय असल्याने सासरच्या मंडळींनी मारहाण करीत छळ केला. या प्रकरणी धरणगाव पोलिसात पतीसह सासरच्या सहा जणांविरुद्ध गुन्हा दाखल करण्यात आला.
सहा संशयीतांविरोधात गुन्हा दाखल
याबाबत योगीता अशोक पाटील (28, गंगाधरा, ता.बारडोली, जि. सुरत, ह.मु.पिंपळे बुद्रुक, पोस्ट-साकरे, ता.धरणगाव) यांच्या फिर्यादीनुसार, सासरच्या मंडळींनी माहेरून घर गहाण ठेवण्यासाठी एक लाख आणावेत म्हणून वेळोवेळी शारीरीक व मानसिक छळ करीत गांजपाठ केला तसेच चारीत्र्यावर संशय घेत पती अशोक पाटील यांनी माहेरी घरी येऊन घर गहाण ठेवण्यासाठी एक लाखाची मागणी केली तसेच अश्लील शिविगाळ करून जीवे ठार मारण्याची धमकी देऊन फारकतीची मागणी केली.
विवाहितेच्या तक्रारीवरून पती अशोक विश्वास पाटील, सासू सुशीलाबाई विश्वास पाटील (रा.पथराड, ता.धरणगाव), नणंद उज्वला अर्जुन पाटील, नंदोई अर्जुन गंगाराम पाटील (गंगाधरा, ता.बारडोली), नणंद सपना धीरज पाटील, नंदोई धीरज कैलास पाटील (रा.जतपूर, बडोदा, गुजरात) यांच्याविरुद्ध गुन्हा दाखल करण्यात आला. पुढील तपास एएसआय करीम सयैद करीत आहेत.
