धरणगाव पोलिस निरीक्षकांची सतर्कता : डिझेल चोरी करणार्‍या टोळीतील सदस्य पाठलागाअंती धरणगाव पोलिसांच्या जाळ्यात

पोलिसांना पाहताच चोरांनी काढला पळ !
पोलिस निरीक्षक उद्धव ढमाले हे आपल्या सहकारी नितीन चौधरीसह रात्रीच्या गस्तीवर होते. पोलिस निरीक्षक ढमाले यांना कार ओळखीची वाटल्यामुळे त्यांनी चालक चौधरी यांना पोलिस वाहन कारच्या समोर लावायच्या सूचना केल्या. पोलिस वाहन आपल्या दिशेने येत असल्याचे बघताच चोरटे घाईघाईने कारमध्ये बसून चोपड्याच्या दिशेने सूसाट निघाले. पोलिस निरीक्षक ढमाले यांनी देखील चालक चौधरी यांच्यासह कारचा पाठलाग करायला सुरुवात केली. पोलिस निरीक्षक ढमाले यांनी तेवढ्यात रोटवदचे पोलिस पाटील नरेंद्र शिंदे यांना फोन करून घटनेची माहिती देत पोलिस वाहनाच्या मागे येण्याच्या सूचना केल्यात.

मध्यरात्री पाठलागाचा सिनेस्टाईल थरार
मध्यरात्री तीन वाजेच्या सुमारास चोर-पोलिसांच्या पाठलागचा सिनेस्टाईल थरार सुरू झाला. पोलिस पाठलाग करत असल्याचे लक्षात येताच मार्ग बदलत दिशाभूल करण्याचा प्रयत्न चोरट्यांनी केला. परंतु पोलीस मागे हटलेच नाही. नांदेड फाटा आल्यावर चोरट्यांना कळून चुकले की, आपण कारने कितीही पळ काढला तरी पोलीस आपला पिच्छा सोडणार नाहीत. त्यामुळे त्यांनी कार तिथंच सोडून शेतातून पळ काढायला सुरुवात केली. पोलिस निरीक्षक ढमाले यांना कळून चुकले होते की, ही सराईत गुन्हेगारांची टोळी आहे. त्यांच्याकडे हत्यार आहेत. त्यामुळे त्यांनी वाहनातून उतरताच सापळे पिस्तुल काढत आपले सहकारी नरेंद्र चौधरी यांच्यासह पाठलाग सुरू केला.

नरेंद्र चौधरींनी मोठ्या हिंमतीने पकडले चोराला !
निरीक्षक ढमाले यांना आणि पोलिस कर्मचारी नरेंद्र चौधरी हे वेगवेगळ्या दिशेने चोरांचा पाठलाग करत होते. थोडावेळ पाठलाग केल्यानंतर गुरु उर्फ प्रशांत हा त्यांच्या टप्प्यात आला. पोलिस आपल्या जवळ आल्याचे लक्षात येताच गुरुने चाकू काढून चौधरी यांना मारण्याची धमकी दिली. परंतू पोलीस कर्मचारी चौधरी यांनी न भिता मोठ्या हिंमतीने चोरासोबत दोन हात करत त्याला ताब्यात घेतले. दरम्यान, धरणगाव पोलिसांनी दाखवलेल्या धाडसामुळे चोरीचा प्रयत्न असफल तर झालाच. परंतू डीझेल चोरणारी एक मोठी टोळी पोलिसांच्या रेकॉर्डवर आली आहे.

अधिकारी, कर्मचार्‍याच्या धाडसाचे होतेय कौतुक !
पोलिस निरीक्षक उद्धव ढमाले आणि पोलिस कर्मचारी नरेंद्र चौधरी यांच्या धाडसाचे धरणगावकर कौतुक करत आहेत. निरीक्षक ढमाले यांनी देखील पोलिस कर्मचारी नरेंद्र चौधरीचे अभिनंदन केले आहे. या प्रकरणी चालक शिवेंद्रसिंग धाकर ह्यांच्या फिर्यादीवरून गुन्हा दाखल करण्यात आला. तपास सहाय्यक निरीक्षक जिभाऊ पाटील हे करीत आहेत. दरम्यान, अटकेतील चोरट्याने धरणगावसह पारोळा, चोपडा, अमळनेरसह इतर ठिकाणी देखील चोरी केल्याचे पोलिस तपासात समोर आले आहे. पोलिसांनी कार जप्त करून ठाण्यात आणली आहे.