रशियात आयोजित ब्रिक्स परिषदेसाठी केंद्रीय मंत्री रक्षाताई खडसे रवाना
![](https://breakingmaharashtra.com/wp-content/uploads/2024/05/raksha-khadse.gif)
मुक्ताईनगर : केंद्रीय युवा कार्य व क्रीडा राज्यमंत्री श्रीमती रक्षा निखिल खडसे या उल्यानोव्स्क, रशिया येथे आयोजित ब्रिक्स युवा मंत्रीस्तरीय बैठकीत सहभाग घेण्यासाठी रवाना झाल्या आहेत.
भारताचे करणार प्रतिनिधीत्व
या बैठकीचा मुख्य उद्देश आंतरराष्ट्रीय संबंधांच्या कार्यक्षमतेत वाढ आणि त्याच्या अधिक लोकशाहीकरणासाठी युवा नेत्यांना एकत्र आणणे हा आहे. खडसे या बैठकीमध्ये भारताचे प्रतिनिधित्व करतील. या बैठकीत विविध पॅनल चर्चा व सत्रे आयोजित करण्यात येणार आहेत, ज्यामध्ये शाश्वत विकास, डिजिटल परिवर्तन आणि सामाजिक समावेशन यांसारख्या महत्त्वाच्या मुद्यांवर चर्चा होईल. या सत्रांद्वारे युवा नेत्यांना सशक्त बनविणे आणि त्यांना त्यांच्या देशात आणि जागतिक स्तरावर सकारात्मक बदल घडविण्यासाठी आवश्यक ज्ञान व साधने प्रदान करणे यावर भर दिला जाणार आहे.
ब्रिक्स हा ब्राझील, रशिया, भारत, चीन, दक्षिण आफ्रिका तसेच इजिप्त, इथिओपिया, इराण आणि संयुक्त अरब अमिराती या अर्थव्यवस्थांचा समूह आहे. ब्रिक्सचे उद्दिष्ट आर्थिक विकास वाढवणे, आंतरराष्ट्रीय व्यापार व गुंतवणूक प्रोत्साहित करणे, आणि जागतिक समस्यांवर संयुक्त उत्तर शोधणे हे आहे. ब्रिक्स देशांच्या एकत्रित जीडीपी (सकल देशांतर्गत उत्पादन) जगाच्या जीडीपीच्या सुमारे 28% आहे. दरवर्षी ब्रिक्स देशांच्या शिखर परिषदा आयोजित केल्या जातात. या परिषदा आर्थिक, राजनैतिक, आणि सांस्कृतिक सहकार्य वाढवण्यासाठी महत्त्वपूर्ण असतात. ब्रिक्स सारख्या मंचांद्वारे युवा नेते आंतरराष्ट्रीय संबंधांच्या लोकशाहीकरणासाठी व कार्यक्षम प्रणालीसाठी योगदान देऊ शकतात.
ब्रिक्स युवा मंत्रीस्तरीय बैठक 2024 सदस्य देशांमध्ये अधिक मजबूत संबंध निर्माण करण्यास आणि नाविन्यपूर्ण कल्पना व सर्वोत्तम पद्धतींच्या देवाण-घेवाणीस प्रोत्साहन देईल अशी अपेक्षा आहे. केंद्रीय राज्यमंत्री रक्षाताई खडसे यांचा या कार्यक्रमातील सहभाग भारताच्या युवा सक्षमीकरणाच्या व बहुपक्षीय मंचांद्वारे आंतरराष्ट्रीय सहकार्याच्या वचनबद्धतेला अधोरेखित करतो.