भुसावळ बाजारपेठ पोलिसांची मोठी कारवाई : चोरीच्या 16 दुचाकींसह मध्यप्रदेशातील अट्टल चोरटे जाळ्यात

Bhusawal Market Police take major action: 16 stolen two-wheelers along with a stubborn thief from Madhya Pradesh caught in the net भुसावळ (1 सप्टेंबर 2025) : जळगाव जिल्ह्यातील अनेक भागांसह नजीकच्या मध्यप्रदेशातून तब्बल 16 दुचाकी चोरी करणार्‍या अट्टल चोरट्यांच्या भुसावळ बाजारपेठ पोलिसांनी मुसक्या आवळल्या आहेत. आरोपींविरोधात मध्यप्रदेशात एक गुन्हा दाखल असल्याची माहिती सूत्रांनी दिली. काल्या उर्फ विक्रम केसरसिंग बारेला (20, गारण्या, ता.झिरण्या, जि.खरगोन, मध्यप्रदेश) व राहुल रितेश चव्हाण (18, जयभीम मोहल्ला, शाहपूर, जि.बर्‍हाणपूर, मध्यप्रदेश) अशी अटकेतील आरोपींची नावे आहेत.

सीसीटीव्हीद्वारे आरोपी निष्पन्न
भुसावळातील किराणा व्यावसायीक अझरुद्दीन नियाजुद्दीन शेख (38, गौसिया नगर, भुसावळ) यांच्या मालकिची दुचाकी (एम.एच.19 बी.व्ही.5886) ही 16 जुलै 2025 रोजी चोरीला गेल्याप्रकरणी बाजारपेठ पोलिसात गुन्हा दाखल होता. पोलिसांकडून तपास सुरू असताना सीसीटीव्हीत संशयीत निष्पन्न झाल्यानंतर त्यांचा शोध सुरू करण्यात आला व आरोपींना मध्यप्रदेशातून 23 ऑगस्ट रोजी अटक करण्यात आली. पोलिस कोठडीदरम्यान आरोपींनी भुसावळसह नजीकच्या जामनेर, सावदा, फैजपूर तसेच जिल्ह्यातील काही भागातून तसेच मध्यप्रदेशातून दुचाकी चोरी केल्याची कबुली दिल्याने एकूण आठ लाख 32 हजार रुपये किंमतीच्या 16 दुचाकी जप्त करण्यात आल्या. आरोपींची पोलिस कोठडीची मुदत संपल्याने त्यांची आता न्यायालयीन कोठडीत रवानगी करण्यात आली आहे.