A bus carrying students and passengers skidded off the road: Accident in Pachora taluka. पाचोरा (22 डिसेंबर 2025) : शालेय विद्यार्थी व प्रवाशांनी खच्चून भरलेली बस घसरून अपघात झाल्याची घटना पाचोरा तालुक्यातील मोंढाळे-निंभोरी गावादरम्यान सोमवारी सायंकाळी घडली. सुदैवाने या अपघातात कुणीही जखमी झाले नाही. विरुद्ध दिशेने येणार्या ट्रॅक्टरने कट मारल्याने चालकाचे नियंत्रण सुटल्याने बस खोल खड्ड्यात घसरल्याचे सांगण्यात आले.
असा घडला अपघात
सोमवार, 22 डिसेंबर रोजी सायंकाळी 5.30 वाजता बस (एम.एच.14 बी.टी.2611) पाचोरा स्थानकातून निघाल्यानंतर मोंढाळे ते निंभोरी गावांच्या दरम्यान माजी सरपंच मीनाक्षी दिवटे यांच्या शेताजवळ समोरून येणार्या ट्रॅक्टरने बसला जोरात कट मारल्याने व रस्ता अरुंद असल्याने तसेच साईड पट्टीवर टाकलेल्या कच्च्या मातीमुळे बसचे चाक घसरून ती खड्ड्यात शिरली.
अपघाताचा घडताच मोठा आवाज होताच बसमधील विद्यार्थी ओरडू लागले. ही दृश्ये पाहताच स्थानिक ग्रामस्थ अर्जुन राठोड, भगवान नलावडे, सागर पाटील, रामराव दिवटे आणि कोतवाल महेंद्र राऊतराय यांच्यासह अनेक तरुणांनी घटनास्थळी धाव घेतली. बसच्या काचा फोडून अडकलेल्या 50 प्रवाशांना आणि विद्यार्थ्यांना सुखरूप बाहेर काढण्यात आले. या धडकेत बसच्या चालकाच्या हाताला गंभीर दुखापत झाली आहे.
अपघाताची माहिती मिळताच पाचोरा आगार व्यवस्थापक प्रकाश पाटील यांनी पथकासह घटनास्थळी पोहोचून प्रवाशांची विचारपूस केली. रस्त्याच्या कामामुळे पसरलेल्या मातीमुळे चालकाला बस चालवताना अडचण आल्याचे प्राथमिक दर्शनी समोर आले आहे. क्रेनच्या सहाय्याने बसला खड्ड्यातून बाहेर काढण्यात आले. या अपघातामुळे महामार्गावरील वाहतूक सुमारे अर्धा तास विस्कळीत झाली.
