Sanjana Patil has been appointed as the group leader of the Muktainagar Nagar Panchayat मुक्ताईनगर (30 डिसेंबर 2025) : मुक्ताईनगर नगरपंचायतीच्या गटनेतेपदी लोकनियुक्त नगराध्यक्षा संजना चंद्रकांत पाटील यांची बिनविरोध निवड करण्यात आली. या निवडीमुळे नगरपंचायतीतील सत्तासमीकरण स्पष्ट झाले आहे. आगामी काळात शहर विकासाला अधिक गती मिळण्याची अपेक्षा व्यक्त होत आहे.
संजना पाटील यांची बिनविरोध निवड
मुक्ताईनगर नगरपंचायत निवडणुकीनंतर गटनेतेपद कोणाकडे जाणार, याकडे संपूर्ण तालुक्याचे लक्ष लागले होते. सोमवार, 29 डिसेंबर 2025 रोजी जळगाव येथील जिल्हाधिकारी कार्यालयात जिल्हाधिकारी रोहन घुगे यांच्या प्रमुख उपस्थितीत ही निवड प्रक्रिया पार पडली. यावेळी उपस्थित सर्व नवनिर्वाचित सदस्यांनी एकमताने संजना पाटील यांच्या नावावर शिक्कामोर्तब केले.
या निवडीमुळे नगरपंचायतीतील सत्ताधारी गट अधिक बळकट झाला असून, नगराध्यक्षा व गटनेत्या अशी दुहेरी जबाबदारी संजना पाटील यांच्याकडे आली आहे. त्यांच्या नेतृत्वाखाली शहरातील विकासकामांना दिशा मिळेल, तसेच प्रशासकीय निर्णयप्रक्रिया अधिक प्रभावी होईल, असा विश्वास सत्ताधारी गटातील सदस्यांकडून व्यक्त करण्यात आला आहे.
निवड प्रक्रियेवेळी शिवसेनेचे विजयी उमेदवार तसेच सहयोगी अपक्ष नगरसेवक मोठ्या संख्येने उपस्थित होते. शिवसेनेतर्फे प्रशांत अशोक टोंगे, खान नसीबाबी शाहबाज, भालेराव प्रीती प्रमोद (वानखेड प्रीती राजरत्न), सोनवणे अंजनाबाई सुपडू, शेख ताहेराबी लुकमान, शेख मस्तान शेख इमाम, कोळी संतोष प्रल्हाद, भारंबे प्रमोद हरी, भलभले सविता सुभाष आणि शिरसाट देवयानी निलेश हे सदस्य उपस्थित होते. तसेच सहयोगी अपक्ष उमेदवार नुसरत बी. मेहबूब खान, हासम शहा कासम शहा आणि सलीमाबी मुशीर मण्यार यांनीही या निवडीसाठी आपला पाठिंबा दर्शवला.
फटाक्यांची आतषबाजी
गटनेतेपदी निवड जाहीर होताच मुक्ताईनगर शहरात आनंदाचे वातावरण निर्माण झाले. कार्यकर्त्यांनी फटाक्यांची आतषबाजी करत जल्लोष साजरा केला, तर नागरिकांकडून संजना पाटील यांच्यावर शुभेच्छांचा वर्षाव होत आहे. नगराध्यक्षा आणि गटनेत्या अशा दुहेरी भूमिकेतून त्या शहराच्या सर्वांगीण विकासाचा नवा रोडमॅप आखतील, अशी अपेक्षा नागरिक व्यक्त करत आहेत.
एकूणच मुक्ताईनगर नगरपंचायतीतील या बिनविरोध निवडीमुळे राजकीय स्थैर्य प्राप्त झाले असून, आगामी काळात शहराच्या विकासकामांना वेग मिळेल, असा आशावाद व्यक्त होत आहे.
