फैजपूर पोलिसांची मोठी कामगिरी : 30 हजारांचे केळी घड चोरणार्‍या बामणोदच्या मुख्य संशयीताला बेड्या

फैजपूर (मंगळवार, 1 ऑगस्ट 2026) : शेतकर्‍याच्या शेतातील केळीचे घड चोरी करणार्‍या मुख्य पसार आरोपीला फैजपूर पोलिसांनी अटक केली आहे. संशयीताकडून चोरीच्या केळी विक्रीतून मिळालेली 15 हजार रुपयांची रक्कम जप्त करण्यात आली. ही कारवाई फैजपूर पोलिसांनी केली.

काय आहे प्रकरण ?
4 जुलै 2026 रोजी रात्री 7.08 वाजता शेतकरी जितेंद्र दिनकर कोळी (45, रा. त्रिमूर्ती चौक, फैजपूर, ता.यावल) यांनी फैजपूर पोलिसात तक्रार दिली होती. शेतकर्‍याच्या मौजे आमोदा गावाच्या शिवारातील शेत गट क्रमांक 205 मधील केळीच्या शेतातून सुमारे 30 हजार रुपये किंमतीचे 15 क्विंटल केळीचे घड अज्ञात चोरट्याने चोरून नेले होते.
या प्रकरणात लहू अशोक केदारे, अजय सुनील केदारे, शुभम विजय केदारे आणि सुरज मिलिंद मोरे (सर्व रा. लुंबिनीनगर, बामणोद, ता. यावल) यांची नावे निष्पन्न झाली. त्यापैकी मुख्य संशयित लहू अशोक केदारे हा गुन्हा केल्यानंतर पसार होता.