Sudden collapse of Tapi Bridge near Sarangkheda village : Traffic diverted to alternative route सारंगखेडा : शहराजवळ तापी नदीवरील पुलाला मोठे भगदाड पडल्याचा प्रकार रविवारी दुपारी वाहनधारकामुळे उघडकीस आल्याने अप्रिय घटना टळली तर या प्रकाराची दखल घेत तातडीने या पुलावरून वाहतूक थांबवण्यात आली. वाहनधारकांना आता पर्याची मार्गाने वाहतूक करावी लागत आहे. राष्ट्रीय महामार्ग विभागाने तातडीने आता पुलावर दुरुस्तीचे काम हाती घेतले आहे.
भराव खचल्यानंतरही बेफिकिरी कायम
गेल्या अनेक दिवसांपासून सारंगखेडा पुलाचा टाकरखेडा गावाकडील भराव खचल्याने पुलाला धोका असल्याची स्थिती असतानाही संबंधित विभागाने याकडे दुर्लक्ष केले होते. असे असताच रविवारी अखेर दुपारी चार वाजेच्या सुमारास भराव खचल्याने पुलाला मोठे भगदाड पडले. ही बाब एका ट्रक चालकाच्या लक्षात आल्यानंतर त्याने इतर वाहनधारकांना ही माहिती दिली. तसेच सारंगखेडा पोलीस ठाण्यातही त्याबाबत माहिती दिल्याने पोलीस निरीक्षक संदीप पाटील हे कर्मचार्‍यांसह घटनास्थळी दाखल झाले. तसेच दोंडाईचा येथील पोलीस निरीक्षक श्रीराम पवार हेही कर्मचार्‍यांसह घटनास्थळी दाखल होत वाहतूक तात्काळ बंद केली.
वाहतूक पर्यायी मार्गाने वळवली
घटनेची माहिती मिळाल्यानंतर राष्ट्रीय महामार्गाचे कार्यकारी अभियंता प्रवीण साळुंखे हेदेखील घटनास्थळी दाखल झाले. पुलाला दोन्ही बाजूने बॅरेकेटींग करण्यात आले असून वाहतूक बंद केली आहे. त्यामुळे दोंडाईचाहून शहादाकडे व शहाद्याहून दोंडाईचाकडे जाणारी वाहतूक प्रकाशामार्गे वळविण्यात आली आहे.
