सीमी प्रकरणात भुसावळातून अटक केलेल्या शिक्षकाला 15 दिवसांची पोलीस कोठडी

15 days police custody to the teacher arrested from Bhusawal in the Seemi case भुसावळ : सीमी प्रकरणात दाखल असलेल्या गुन्ह्यात 22 वर्षांपासून फरार असलेल्या भुसावळातील न.पा.उर्दू शाळेतील शिक्षकाला न्यू दिल्लीतील विशेष सेलच्या पोलिसांनी गुरुवार, 22 फेब्रुवारी रोजी दुपारी अटक केली होती. दरम्यान, या कारवाईनंतर शुक्रवारी नगरपालिका शिक्षण विभागाच्या प्रशासन अधिकार्‍यांनी उर्दू शाळा क्रमांक 19 च्या मुख्याध्यापकांना पत्र देत घडल्या प्रकाराबाबत अहवाल मागितला आहे. हा अहवाल प्रशासन अधिकार्‍यांना मिळाल्यानंतर तो पालिका मुख्याधिकार्‍यांना सादर होईल व त्यानंतर पुढील कारवाईची दिशा ठरेल, असे मुख्याधिकारी महेश वाघमोडे यांनी सांगितले. दरम्यान, भुसावळातून संशयित हनीफ शेख मोहम्मद हनीफ यास अटक करून निघालेली दिल्ली पोलिसांची टीम शुक्रवारी रात्री उशिरा पोहोचल्यानंतर शनिवारी दुपारी संशयिताला पटियाला हाऊस न्यायालयात हजर केले असता संशयिताला 15 दिवसांची पोलीस कोठडी सुनावण्यात आली असल्याची माहिती तपासाधिकारी पोलीस निरीक्षक पवन कुमार यांनी दिली.

भुसावळातील उर्दू शाळेच्या मुख्याध्यापकांनाप्रशासनाचे पत्र
न.पा.शाळेचे प्रभारी शिक्षण अधिकारी तुषार प्रधान यांनी घडलेल्या प्रकारानंतर उर्दू शाळेच्या मुख्याध्यापक पत्र दिले आहे. त्यात नेमका काय प्रकार घडला व कोणत्या कारणान्वये शिक्षकांवर अटकेची कारवाई झाली याबाबत विचारणा केली असून त्याबाबत अहवाल पाठवण्याचे सूचित केले आहे. मुख्याध्यापकांकडून अहवाल येताच तो मुख्याधिकार्‍यांकडे सादर होईल व त्यानंतर पुढील कारवाई होणार आहे. मुख्याधिकारी महेश वाघमोडे म्हणाले की, 48 तासांपेक्षा जास्त कालावधीत कुणी अटकेत राहिल्यास त्यांच्यावर निलंबनाची कारवाई केली जाते. संबंधित शिक्षकांबाबत अद्याप आपल्यापर्यंत अहवाल आलेला नाही व तो आल्यानंतर कारवाईची दिशा ठरेल, असेही त्यांनी सांगितले.