जळगावातील दोन पॉश हॉटेलमध्ये सुरू होता अवैध कुंटणखाना : पोलिसांनी चौघांना ठोकल्या बेड्या

न्यूज डेस्क । जळगाव (22 डिसेंबर 2024) : जळगाव शहरातील दोन हॉटेलमध्ये पोलिसांनी छापा टाकून कुंटनखाना सुरू असल्याचे उघडकीला आणले. या कारवाईत एक महिलेची सुटका करण्यात आली असून एका बांगलादेशी तरुणीसह चार जणांना पोलिसांनी ताब्यात घेतले. या कारवाईने परिसरात खळबळ उडाली.

काय घडले नेमके ?
जळगाव शहरातील एमआयडीसी पोलीस ठाणे हद्दीतील हॉटेल चित्रकूटमध्ये कुंटनखाना सुरू असल्याची माहिती उपविभागीय पोलीस अधिकारी संदीप गावीत यांना मिळाली. त्यांनी पथक रवाना केले. पोलीस पथकाने हॉटेल चित्रकूटमध्ये डमी ग्राहक पाठविला व त्यास काही आढळल्यास मिस कॉल देण्यास सांगितले. डमी ग्राहकाने मिस कॉल दिल्यानंतर, एमआयडीसी पोलिस ठाण्याचे पोलिस निरीक्षक संदीप पाटील यांच्यासह पथकाने छापा मारला. या कारवाईत काउंटरवर नीलेश गुजर व चेतन माळी आढळले. त्यांची अंगझडती घेतली असता डमी ग्राहकाने दिलेले 1500 रुपये आणि मोबाईल आढळले. हॉटेलमधील एका खोलीत डमी ग्राहक व एक महिला आढळली.

बांग्लादेशी तरुणी जाळ्यात
पोलिसांनी हॉटेल चित्रकूटमध्ये आढलेल्या महिलेची चौकशी केली असता ती हॉटेल यशमधून आल्याची माहिती तिने दिली. तिच्या सोबत असलेली दुसरी महिला हॉटेल यशमध्ये असल्याचे सांगितले. तेथून व्यवस्थापक विजय सखाराम तायडे याच्यासह एका तरुणीला ताब्यात घेतले. ती तरुणी बांगलादेशी असल्याचे आढळून आले. बांगलादेशी तरुणीकडे कोणतेही दस्ताऐवज आढळून आले नाही.

हॉटेल यशचा व्यवस्थापक विजय तायडे याच्याशी बांगलादेशी तरुणीचा संपर्क झाला व देहव्यापारातून तिला पैसे दिले जाणार असल्याचे सांगून तिला येथे आणले असल्याची माहिती सदर तरुणीने पोलिसांना दिली. याप्रकरणी पोकॉ गोपाल पाटील यांनी एमआयडीसी पोलिस ठाण्यात फिर्याद दिली. त्यावरून नीलेश गुजर, चेतन माळी, विजय तायडे या तिघांविरुद्ध गुन्हा दाखल करण्यात आला. तसेच बांगलादेशी तरुणीविरुद्धही गुन्हा दाखल करण्यात आला.