गोकुळ दूध संघावर महायुतीचे वर्चस्व ; राजेश पाटील अध्यक्षपदी विराजमान!

कोल्हापूर (मंगळवार, 10 नोव्हेंबर 2026) : कोल्हापूर जिल्ह्याच्या सहकार क्षेत्रातील प्रतिष्ठेच्या गोकुळ दूध संघाच्या सत्तासंघर्षात अखेर महायुतीने बाजी मारली आहे. अध्यक्षपदाच्या अत्यंत चुरशीच्या निवडणुकीत महायुतीचे उमेदवार तथा माजी आमदार राजेश पाटील यांनी 16 मते मिळवत विजय संपादन केला. त्यांच्या विरोधात रिंगणात असलेले काँग्रेस नेते सतेज पाटील यांच्या नेतृत्वाखालील समविचारी आघाडीचे उमेदवार शशिकांत पाटील चुयेकर यांना 13 मतांवर समाधान मानावे लागले. या निकालामुळे गोकुळ दूध संघावरील सत्तेचे समीकरण बदलले असून, सतेज पाटील गटाला मोठा राजकीय धक्का बसला आहे. विशेष म्हणजे, शासननियुक्त चार संचालकांची मते निकालात निर्णायक ठरली.

चुरशीच्या निवडणुकीत महायुतीची बाजी
गोकुळ दूध संघाच्या अध्यक्षपदासाठी सोमवारी सकाळी 11 वाजता मतदान प्रक्रियेला सुरुवात झाली. महायुतीकडून माजी आमदार राजेश पाटील, तर समविचारी आघाडीकडून शशिकांत पाटील चुयेकर यांनी उमेदवारी दाखल केली होती. निवडणुकीच्या पार्श्वभूमीवर दोन्ही गटांमध्ये मोठी राजकीय चुरस पाहायला मिळाली. महायुतीचे संचालक पिवळे फेटे परिधान करून मतदानासाठी दाखल झाले. मतदानापूर्वी दोन्ही गटांच्या संचालकांनी गोकुळचे शिल्पकार आनंदराव पाटील चुयेकर यांच्या पुतळ्याला अभिवादन केले.

गोकुळ चौकात पोलिसांचा कडेकोट बंदोबस्त
निवडणुकीदरम्यान कोणताही अनुचित प्रकार घडू नये, यासाठी प्रशासनाने मोठी खबरदारी घेतली होती. गोकुळ चौक परिसराला पोलीस छावणीचे स्वरूप आले होते. सुमारे 600 पोलीस अधिकारी व कर्मचारी आणि राज्य राखीव पोलीस दलाचे 100 जवान, असा एकूण 700 पोलिसांचा बंदोबस्त तैनात करण्यात आला होता. दोन्ही गटांच्या समर्थकांसाठी स्वतंत्र जागा निश्चित करण्यात आल्या होत्या. तसेच मुख्य कार्यालयाकडे जाणार्‍या मार्गावर वाहनांची कसून तपासणी करण्यात येत होती.

न्यायालयाच्या निर्देशानुसार स्वतंत्र मतपेट्या
औरंगाबाद खंडपीठाच्या निर्देशानुसार ही निवडणूक प्रक्रिया पार पडली. एकूण 29 संचालकांनी मतदानाचा हक्क बजावला. यामध्ये 25 निर्वाचित आणि चार शासननियुक्त संचालकांचा समावेश होता. न्यायालयाच्या आदेशानुसार 25 निर्वाचित संचालकांची मते एका मतपेटीत, तर शासननियुक्त चार संचालकांची मते स्वतंत्र मतपेटीत सीलबंद ठेवण्यात आली होती.

25 निर्वाचित संचालकांच्या मतांमधून स्पष्ट बहुमत मिळाल्यास शासननियुक्त संचालकांच्या मतांची मोजणी करण्याची आवश्यकता नव्हती. मात्र, निवडणुकीच्या अंतिम निकालात या चार मतांची भूमिका निर्णायक ठरली. संपूर्ण मतदान प्रक्रियेचे व्हिडिओ चित्रीकरणही करण्यात आले.

25 नोव्हेंबरच्या सुनावणीकडे लक्ष
राजेश पाटील यांच्या विजयाची घोषणा झाली असली, तरी या निवडणूक प्रक्रियेवर न्यायालयीन निर्णयाची टांगती तलवार कायम आहे. 25 नोव्हेंबर रोजी उच्च न्यायालयात होणार्‍या पुढील सुनावणीतील अंतिम निकालाच्या अधीन ही प्रक्रिया राहणार असल्याचे न्यायालयाने स्पष्ट केले आहे त्यामुळे महायुतीने सध्या गोकुळच्या अध्यक्षपदाच्या निवडणुकीत बाजी मारली असली, तरी न्यायालयाच्या पुढील निर्णयाकडे कोल्हापूरच्या राजकीय आणि सहकार क्षेत्राचे लक्ष लागले आहे.