भुसावळातील स्पर्धा संजय सावकारेंशी जगन सोनवणेंचे डिपॉजिट जप्त होणार

विश्‍वासात न घेता दिला उमेदवार
माजी आमदार संतोष चौधरी म्हणाले की, सुप्रीमो शरद पवार यांना विचारूनच सतीश घुले यांना उमेदवार म्हणून पुढे आणले मात्र तिकीट वाटपाच्या गोंधळात कवाडे यांनी आघाडी तोडण्याची भाषा केल्याने चुकीच्या माणसाला तिकीट मिळाले. वास्तविक काँग्रेस पक्ष चिन्हावर निवडणूक लढवून तीन हजार मते मिळवत डिपॉजीट जप्त झालेल्या उमेदवाराव्यतिरिक्त अन्य उमेदवारास तिकिट देणे गरजेचे होते मात्र पक्षाने तिकीट देताना आम्हाला विश्‍वासात घेतले नाही तर रावेरातही अनिल चौधरींना राष्ट्रवादीचे तिकीट मागितले मात्र तेथेही ऐकण्यात न आल्याने अपक्ष उमेदवारांना आम्ही संधी देत आता परीवर्तन घडवू, असेही ते म्हणाले. सर्व पदाधिकारी, नगसेवकांसोबत चर्चा करून अपक्ष उमेदवाराचे काम करण्याच्या निर्णयावर ठाम आहोत. याबाबत सतीश घुले, डॉ.मधू मानवतकर, गीता खाचणे व यमुना रोटे यांच्यापैकी कोणाला मदत करावी, याबाबतचा निर्णय आम्ही रविवारी सायंकाळी साडेसहा वाजता तेली समाज मंगल कार्यालयात होणार्‍या मेळाव्यात जाहीर करू, असेही ते म्हणाले.

जनतेला वार्‍यावर सोडणार नाही
विधानसभा निवडणुकीत जनतेला परीवर्तन घडवून आणायचे आहे. शहरातील रस्ते, गटारी, पाणी, स्वच्छता, पथदिवे आदींची स्थिती बिकट आहे. या प्रश्नी जनतेकडून बोलणारे कोणीही नाही मात्र आम्ही अपक्ष उमेदवाराला पूर्ण मदत करून या सर्व समस्या सोडवू. जनतेला कोणत्याही स्थितीत वार्‍यावर सोडणार नाही, असेही चौधरी म्हणाले.

नगरसेवक पदाचा राजीनामा द्यावा
जगन सोनवणे यांनी आमच्याकडे केवळ तीन नगरसेवक आहेत यासह अनेक आरोप केले आहेत. यामुळे सोनवणेंचा आता आमच्याकडे येण्याचा मार्ग बंद झाला आहे. आमच्याकडे आले तरी आता त्यांना मदत नाहीच शिवाय त्यांचे डिपॉजिट जप्त केल्याशिवाय आपण स्वस्थ बसणार नाही तसेच ते आमचे स्पर्धकदेखील नाही, आमची प्रमुख लढत भाजपा उमेदवारासोबत असून सोनवणे यांच्या पत्नी पुष्पा सोनवणे यांनी स्विकृत नगरसेवक पदाचा राजीनामा द्यावा, अशी विनंतीही आपण त्यांना करणार असल्याचे ते म्हणाले.

सरकार स्थापण्यात अपक्षांचा वाटा
भुसावळ व रावेर मतदारसंघातून प्रचंड मतांनी विजयी झालेल्या उमेदवारांचा राज्यातील सरकार स्थापनेत महत्वाचा वाटा असेल व या दोन्ही अपक्षांचा जागा इतिहास घडवतील, असा विश्वासही माजी आमदार संतोष चौधरींनी व्यक्त केला. भाजपला आव्हान देताना तगडा उमेदवार अपेक्षीत होता मात्र राष्ट्रवादी काँग्रेसने आम्हाला विश्वासात न घेता जगन सोनवणे या दुबळ्या उमेदवारास उमेदवारी दिली. गेल्या निवडणूकीत काँग्रेसचा मुख्यमंत्री व सत्ता असतानाही सोनवणे यांना पंजा चिन्हावर केवळ तीन हजार मते मिळवली व डिपॉजीट जप्त झाले. यंदाही सावकारेंचा विजय सोपा करण्यासाठी दुबळा उमेदवार देण्यात आल्याचा आरोप करीत ते म्हणाले की, अपक्षाला ताकद देवून विजयापर्यंत निश्‍चित पोहोचवू, असा आशावादही व्यक्त केला.