मुलांची सुटका करण्यासाठी गेल्यानंतर निलंबीत सहा.निरीक्षकाने केला गोळीबार : सुदैवाने अधिकारी बचावले
राहुरी : मुलांची सुटका करण्यासाठी गेलेल्या श्रीरामपूर येथील पोलीस उपाधीक्षक संदीप मिटके यांच्यावर आरोपीने गोळीबार केल्याने पोलीस वर्तुळात मोठी खळबळ उडाली आहे. राहुरी तालुक्यातील दिग्रस येथे एका निलंबित सहाय्यक पोलीस निरीक्षकाने जिल्हा नियोजन समितीच्या माजी सदस्य वैशाली नानोर यांच्या मुलांना रिव्हॉल्वरचा धाक दाखवून डांबून ठेवल्यानंतर उपअधीक्षक मिटके हे सुटका करण्यासाठी गेल्यानंतर हा प्रकार घडला. या घटनेत उपअधीक्षक मिटके हे थोडक्यात बचावले. गुरुवारी सकाळी दहा वाजेच्या सुमारास ही घटना घडली.
रीव्हॉल्व्हरच्या धाकावर मुलांचे अपहरण
आरोपी हा पुणे येथील निलंबित सहाय्यक पोलीस निरीक्षक आहे. त्याने गुरुवारी सकाळी सात वाजेच्या नानोर यांच्या घरात प्रवेश केला. रीव्हॉल्व्हरचा धाक दाखवून लहान मुलांना दाबून ठेवले. आरोपीने त्यांच्या डोक्याला रिव्हॉल्वर रोखून धरले होते. नानोर यांनी प्रसंगावधान राखत मोबाईल वरून परीचितांना या घटनेची माहिती दिली. त्यामुळे थोड्याच वेळात पोलिसांचा फौजफाटा तेथे दाखल झाला. उपअधीक्षक मिटके हे दाखल झाले. सुमारे दोन तास हे नाट्य सुरू होते. अखेर त्यांनी आरोपीवर झडप घालून त्याच्याकडील रिव्हॉल्वर हिसकावून घेण्याचा प्रयत्न केला. यावेळी रिव्हॉल्व्हरमधून गोळी सुटली, ती अधीक्षक मिटके यांचा डोक्याजवळून गेली. मिटके हे थोडक्यात बचावले. जिल्हा पोलीस प्रमुख मनोज पाटील, अतिरिक्त पोलिस अधीक्षक दीपाली काळे हे घटनास्थळी दाखल झाले आहेत. आरोपीला अटक करण्यात आली. दरम्यान आरोपी यांनी दोन दिवसांपूर्वी नानोर यांना जीवे मारण्याची धमकी दिली होती. त्याने खंडणी मागितली होती. याप्रकरणी राहुरी पोलीस ठाण्यात गुन्हा दाखल आहे. हा गुन्हा मागे घेण्यासाठी हे कृत्य आरोपीने केल्याची चर्चा आहे.
