सुसंवादासाठी शब्दांमधील सकारात्मक ऊर्जा जिवंत ठेवा

भुसावळ : संपूर्ण सजीव सृष्टीत व्यक्त होणे ही माणसाकडे असलेली सर्वात मोठी शक्ती आहे. शब्दांमधील सकारात्मक ऊर्जा जिवंत ठेवली तर माणसाला माणसापर्यंत पोहोचता येईल. सकारात्मक सुसंवाद साधण्यासाठी आधी स्वतःशी चांगला संवाद साधा, असा सल्ला व्याख्याते ज्ञानेश्वर शेंडे यांनी तरुण वर्गाला दिला. अंतर्नाद प्रतिष्ठानतर्फे गुरुवार, 7 रोजी नहाटा महाविद्यालय येथे माजी खासदार तथा आमदार कृषी मित्र स्व.हरिभाऊ जावळे व स्व. पुष्पा वसंतराव पाटील यांच्या स्मृतीप्रीत्यर्थ आयोजित पुष्पांजली प्रबोधन मालेचे प्रथम पुष्प लेखक आणि व्याख्याते ज्ञानेश्वर शेंडे यांनी गुंफले. ऊर्जा सकारात्मक संवादाची या विषयावर ते बोलत होते.

यांची विचार मंचावर उपस्थिती
विचार मंचावर कार्यक्रमाच्या अध्यक्षस्थानी यावल शहराचे माजी नगराध्यक्ष पांडुरंग सराफ, ताप्ती एज्युकेशन सोसायटीचे सचिव विष्णू चौधरी, नाहाटा महाविद्यालयाचे उपप्राचार्य वाय.एम.पाटील, पर्यवेक्षक स्वाती पाटील, प्रकल्प प्रमुख शैलेंद्र महाजन, सहसमन्वयक डॉ.संजू भटकर, सहसमन्वयक प्रा.शाम दुसाने उपस्थित होते. प्रास्ताविकात प्रकल्प प्रमुख शैलेंद्र महाजन यांनी अंतर्नाद प्रतिष्ठानतर्फे राबविण्यात येणार्‍या विविध सामाजिक, सांस्कृतिक, शैक्षणिक व पर्यावरण पूरक उपक्रमांची माहिती दिली. माजी खासदार तथा आमदार कृषी मित्र स्व.हरिभाऊ जावळे व स्व.पुष्पा वसंतराव पाटील यांच्या विषयी कृतज्ञता म्हणून दरवर्षी पुष्पांजली प्रबोधन मालेचे आयोजन करण्यात येत असल्याचे त्यांनी सांगितले. कार्यक्रमाचे अध्यक्ष पांडुरंग सराफ यांनी अंतर्नाद प्रतिष्ठानचे कार्य समाजाला चांगली दिशा मिळवून देण्यासाठी अनमोल असल्याचे सांगितले.