भुसावळ शहरात दुसर्‍या दिवशी आठ रोडरोमिओंवर कारवाई

Another day, action was taken against eight roadromios in Bhusawal city भुसावळ : शाळा-महाविद्यालयाच्या आवारात टवाळकी करणार्‍यांविरोधात भुसावळ पोलिस दलाने गुरुवारपासून धडक मोहिम उघडली आहे. निर्भया पथकाच्या माध्यमातून कारवाई केली जात असताना शुक्रवारी शहर व बाजारपेठ पोलिसांनीही त्या-त्या हद्दीतील शाळा-महाविद्यालयांच्या आवारात गस्त करीत विनाकारण रस्त्यावर दुचाकी लावून थांबून असलेल्या, उनाडक्या करणार्‍या आठ टवाळखोरांविरोधात कारवाई केली तर शहर वाहतूक शाखेने चौघांवर मोटार व्हेईकल अ‍ॅक्ट अन्वये कारवाई केल्याची माहिती पोलिस सूत्रांनी दिली.

रोडरोमिओंचे दणाणले धाबे
शहरातील विविध नामांकीत महाविद्यालयात शहरासह ग्रामीण भागातून मोठ्या प्रमाणावर अल्पवयीन मुलींसह युवती शिक्षणासाठी येतात मात्र बसमध्ये, बसस्थानकावर तसेच महाविद्यालयाच्या आवारात येत असताना रोडरोमिओंकडून त्यांना छेडखानीच्या त्रासाला सामोरे जावे लागत असल्याच्या तक्रारी वाढल्यानंतर पोलिस प्रशासनाने अशा टपोरींविरोधात भुसावळचे सिंघम पोलिस उपअधीक्षक कृष्णात पिंगळे यांच्या नेतृत्वात धडक कारवाईची मोहिम उघडण्यात आली आहे. या कारवाईमुळे रोडरोमिओंचे धाबे दणाणले आहे तर पालकवर्गातून पोलिसांच्या कृतीचे स्वागत होत आहे..