शरद पवारांना भाजप नेत्याचे आव्हान ! निवडणुकीवेळी भेटलेल्या त्या दोघांना जनतेसमोर आणा

नेमके काय म्हणाले रावसाहेब दानवे?
रावसाहेब दानवे म्हणाले की, विधानसभा निवडणुकीचा निकाल लागून सहा महिने झाले आहेत, पण महाविकास आघाडीला तो अजूनही पचवता आलेला नाही. ईव्हीएम, मतदार यादी आणि मतदारांच्या वाढीबद्दल यापूर्वीही आरोप केले गेले होते, आणि आता हा चौथा आरोप आहे.

दानवे पुढे म्हणाले, शरद पवार ज्येष्ठ नेते आहेत, पण त्यांनी केलेल्या या आरोपांमुळे राज्यातील जनतेचा अपमान झाला आहे. हे आरोप बिनबुडाचे आणि तथ्यहीन आहेत. त्यांनी ज्या दोन व्यक्तींचा उल्लेख केला आहे, त्यांची ओळख जाहीर करावी. आजकाल सर्वांच्या घरात कॅमेरे आहेत, त्यामुळे ते अधिकारी कोण आहेत, हे त्यांनी जनतेसमोर आणावे.

रावसाहेब दानवे यांनी शरद पवारांच्या आरोपांवर स्पष्टीकरण देताना सांगितले की, निवडणुकीच्या वेळी अनेक सर्वे एजन्सी येतात आणि आम्ही तुम्हाला इतक्या जागा जिंकून देतो, असे सांगतात. हे लोक उमेदवारांनाही भेटतात त्यामुळे पवारांनी उल्लेख केलेले ते दोन लोक अधिकारी नसून सर्वे एजन्सीचे प्रतिनिधी असू शकतात. हे लोक आमच्याकडे लोकसभेला सुद्धा आले आणि विधानसभेला सुद्धा ते आले होते.”