शिर्डी हादरले : पत्नी नांदायला न आल्याने चार मुलांना विहिरीत ढकलत पित्याची आत्महत्या

अरुण काळे हा अहिल्यानगरमधील श्रीगोंदा तालुक्यातील चिखली कोरेगाव या गावातील रहिवासी असून त्याच्या संसार वेलीवर तीन मुलांसह एक मुलगी होती. कौटुंबिक वादामुळे पत्नी आठ दिवसांपूर्वी सोडून गेली मात्र त्यानंतर आलेल्या नैराश्यातून काळेने हे टोकाचे पाऊल उचलल्याची माहिती पोलिसांनी दिली.

चारही मुलांना विहिरीत ढकललं
अरुण काळे याने राहता तालुक्यातील कोर्‍हाळे गावच्या शिवारात चारही मुलांना विहिरीत ढकलले. शिवाणी अरुण काळे (8), प्रेम अरुण काळे (7), वीर अरुण काळे (6), कबीर अरुण काळे (5) अशी मयत मुलांची नावे आहेत. या चौघांना अरुण काळेने पाण्यात ढकलून दिलं. शेवटी स्वतःही हात-पाय बांधून आत्महत्या केली.

दोन मृतदेहांचा शोध सुरू
विहिरीतून तिघांचे मृतदेह बाहेर काढण्यात यश आलं असून अद्याप दोघांचा शोध सुरू आहे. एक हात आणि एक पाय दोरीने बांधलेल्या अवस्थेत विहिरीत अरुण काळेचा मृतदेह आढळून आला. त्यामुळे स्वतःचे हात पाय स्वतः बांधून अरुण काळेने आत्महत्या केल्याचा अंदाज व्यक्त केला जात आहे.