कुंभमेळ्यामुळे नाशिक, ओढा, खैरवाडी, कसबे सुकेणेसह देवळाली रेल्वे स्थानके होणार अद्यावत
भुसावळ (14 ऑक्टोबर 2025) : नाशिक, त्र्यंबकेश्वर येथे होणार्‍या 2027 मधील कुंभमेळ्याच्या निमीत्ताने नाशिक रोड रेल्वे स्थानकावर होणारी भाविक प्रवाशांची होणारी गर्दी लक्षात घेता, रेल्वे प्रशासनाने नाशिक रोड रेल्वे स्थानकासह ओढा, कसबे सुकेणे, खैरवाडी, देवळाली या रेल्वे स्थानकांचा कायापालट होणार आहे, नाशिकरोड रेल्वे स्थानकावर भाविक प्रवाशांची होणारी गर्दी विभागण्यासाठी रेल्वे प्रशासनाने हे नियोजन केले आहे. असे डीआरएम पुनीत अग्रवाल यांनी सांगितले.
कुंभमेळ्याच्या पार्श्वभुमीवर नाशिक रोड रेल्वे स्थानकावर होणार्‍या गर्दीच्या पार्श्वभुमीवर ही गर्दी विभागण्यासाठी रेल्वे प्रशासनाकडून आतापासूनच नियोजन करण्यात आले आहे. एकाच रेल्वे स्थानकावर गर्दी झाल्यावर त्यावर नियंत्रण मिळविणे जड जात असते. यामुळे रेल्वे प्रशासनाकडून मुंबई आणि भुसावळकडून भाविकांनी भरून जाणार्‍या रेल्वे गाड्यांमधील प्रवासी विभागणी करण्यासाठी या गाड्या नाशिक ऐवजी अन्य रेल्वे स्थानकांवर थांबविण्याचा निर्णय घेतले आहे. यामुळे रेल्वे प्रशासनाकडून गेल्या सहा महिन्यापूर्वी नाशिक रोड रेल्वे स्थानकाजवळील ओढा, खैरवाडी, देवळाली, कसबे-सुकेणे या स्थानकांचे अद्यावतीकरण हाती घेतले आहे.
या स्थानकांचा कुंभमेळ्याच्या पार्श्वभुमीवर कायापालट होणार आहे. यामुळे या रेल्वे स्थानकांचे सर्व्हेक्षण केले असून आता कामाला सुध्दा सुरूवात केली आहे. यामुळे नाशिकरोडजवळील ही रेल्वे स्थानके आता अद्यावत केली जात आहे.
अशी होणार कामे
मध्य रेल्वेतील नाशिक रोड स्थानकाजवळील कसबे सुकेणे, ओढा, खैरवाडी, देवळाली या रेल्वे स्थानकांच्या प्लॅटफॉर्मची लांबी वाढविण्यात येणार आहे. येणार्‍या प्रवाशांना पिण्याच्या पाण्याची जास्त प्रमाणात उपलब्धता निर्माण केली जात आहे. वाहनतळ अद्यावत केले जाणार आहे, पादचारी पूल, तिकीट खिडकी, प्रवाशांना थांबण्यासाठी प्रतिक्षालय, रेल्वे स्थानक आणि परिसरात हॅलोजन लाईट, प्रवासी बैठक व्यवस्था आदी कामे केली जात आहे.
