मंत्री रक्षा खडसेंसह तीन पेट्रोल पंपावर लूट : भुसावळसह अकोल्यातील कुख्यात आरोपी गुन्हे शाखेच्या जाळ्यात
आरोपींकडून तीन कट्ट्यांसह 10 जिवंत काडतूस जप्त ः भुसावळातही आरोपींनी केली लूट
Robbery at three petrol pumps including Minister Raksha Khadse : Notorious accused from Bhusawal and Akola in the net of Crime Branch जळगाव (15 ऑक्टोबर 2025) : केंद्रीय मंत्री रक्षा खडसे यांच्या पेट्रोल पंपावर 9 ऑक्टोबर रोजी सशस्त्र दरोडा टाकत लूट करण्यात आली होती व त्यानंतर दरोडेखोरांनी कर्की फाटा, ता.मुक्ताईनगर मनुभाई आशीर्वाद पेट्रोल पंप व वरणगाव शिवारातील तळवेल फाटा येथील सैय्यद पेट्रोल पंपावर लूट करीत सीसीटीव्ही फोडूनन डीव्हीआर लांबवत तब्बल एक लाख 33 हजारांची लूट केली होती. जळगाव गुन्हे शाखेने चार दिवसांच्या अथम परिश्रमानंतर या दरोड्याची उकल करीत भुसावळसह अकोला तालुक्यातील पाच आरोपींना अटक केली आहे तर आरोपींचा एक अल्पवयीन साथीदारही ताब्यात घेण्यात आला आहे.
या आरोपींना अटक
सचिन अरविंद भालेराव (35, भुसावळ, ह.मु.खकनार, जि.बर्हाणपूर, मध्यप्रदेश), पंकज मोहन गायकवाड (23, वेडीमाता मंदीर, जुना सातारा रोड, भुसावळ), हर्षल अनिल बावस्कर (21, बाळापूर, जि. अकोला), देवेंद्र अनिल बावस्कर (23, बाळापूर, जि.अकोला), प्रदुम्न दिनेश विरघट (19, श्रध्दा नगर, कौलखेड अकोला) अशी अटकेतील आरोपींची नावे आहेत.
मोठा शस्त्रसाठा जप्त
आरोपींच्या ताब्यातून 40 हजारांची रोकड, तीन गावठी पिस्टल तसेच पाच मॅग्झीन, 9 मोबाईल फोन, निळया रंगाची सॅक बॅग जप्त करण्यात आली.
यांनी आवळल्या आरोपींच्या मुसक्या
जळगाव पोलिस अधीक्षक डॉ.महेश्वर रेड्डी, अपर पोलिस अधीक्षक अशोक नखाते, भुसावळ उपविभागीय पोलिस अधिकारी संदीप गावीत, यांच्या मार्गदर्शनाखाली गुन्हे शाखेचे वरिष्ठ पोलिस निरीक्षक राहुल गायकवाड, पोलिस उपनिरीक्षक शरद बागल, सोपान गोरे, शेखर डोमाळे, जितेंद्र वल्टे, ग्रेडेड पीएसआय रवी नरवाडे यांनी चार आरोपींना नाशिक येथून एका आरोपीसह एका अल्पवयीनाला अकोला येथून ताब्यात घेतले. आरोपींना तपासकामी मुक्ताईनगर पोलिसांच्या ताब्यात देण्यात आले.
सचिन भालेरावविरोधात दोन गुन्हे
अटकेतील आरोपी सचिन अरविंद भालेराव (35, भुसावळ, ह.मु. खकनार, जि.बर्हाणपूर) याच्याविरोधात भुसावळ बाजारपेठ पोलिसात खुनाचा प्रयत्न व दंगा करणे असे दोन गुन्हे दाखल आहेत. आरोपीला 2024 मध्ये महाराष्ट्र पोलीस कायदा कलम 55 प्रमाणे दोन वर्षाकरीता जळगाव जिल्ह्यातून हद्दपार करण्यात आले होते.
