रामानंद पोलिसांची कामगिरी : आठ वर्षांनंतर बंगाली कारागीराला 12 लाखांच्या सोन्यासह बेड्या
Ramanand Police’s performance: Bengali artisan arrested with gold worth Rs 12 lakhs after eight years जळगाव (23 ऑक्टोबर 2025) : मूळच्या पश्चिम बंगालच्या कारागीराने दागिन्यांसाठी घेतलेले सोने घेवून मूळ गावी पोबारा केला होता. रामानंद पोलिसांनी 2017 मध्ये घडलेल्या गुन्ह्याप्रकरणी आरोपीचा वाराणसीतील ठावठिकाणा कळताच त्याला 11 लाख 90 हजार किंमतीचे 100 ग्रॅम वजनाच्या सोन्यासह बेड्या ठोकल्या. सुशांत सुनील कुंडू (39, रा.नरकर पारा, सांत्रागाच्छी, जि.हावडा, पश्चिम बंगाल) असे अटकेतील आरोपीचे नाव आहे.
असे आहे अपहार प्रकरण
जळगावच्या आर.एन.कॉलनी, गांधी नगरात सचिन वसंतराव भामरे यांचे पिंप्राळा परिसरातील सोमाणी मार्केट येथे ‘साई ज्वेलर्स’ नावाचे दुकान आहे. 30 मार्च 2017 रोजी त्यांच्या दुकानातील कामगार सुशांत सुनील कुंडू याने दागिने बनवण्यासाठी दिलेले एकूण 30 तोळे वजनाच्या सोन्याचा अपहार केला आणि तो मूळ गावी पश्चिम बंगाल येथे पळून गेला.
या घटनेनंतर फिर्यादी भामरे यांच्या तक्रारीवरून रामानंद नगर पोलिसात गुन्हा दाखल करण्यात आला. गुन्हा दाखल झाल्यानंतर पोलिसांनी आरोपीचा त्याच्या मूळ गावी वेळोवेळी शोध घेतला मात्र तो मिळून आला नाही.
लोकेशन मिळताच आवळल्या मुसक्या
जळगाव पोलिस अधीक्षक महेश्वर रेड्डी, अपर पोलिस अधीक्षक अशोक अशोक नखाते यांच्या मार्गदर्शनाखाली रामानंद निरीक्षक राजेंद्र गुंजाळ यांच्यासह एपीआय भूषण कोते, हवालदार जितेंद्र राजपूत, नाईक योगेश बारी, अतुल चौधरी, शिपाई अनिल सोनवणे, दीपक अंजारे यांनी आरोपीला वाराणसी येथून अटक केली व 11 लाख 90 हजार रुपये किंमतीची 100 ग्रॅम वजनाची सोन्याची लगड जप्त केली.
