सोशल मिडीयात ‘ऑनलाईन टास्क’ द्वारे पैसे कमवत असाल तर तुमचीही होवू शकते फसवणूक ! : जळगावात लिपिकाला लाखोंचा गंडा
If you are earning money through ‘online tasks’ on social media, you too may be cheated ! : Clerk swindled of lakhs in Jalgaon जळगाव (8 नोव्हेंबर 2025) : सायबर भामट्यांनी आता घरबसल्या पैसे कमवाचा फंडा आजमावत टास्क देत फसवणुकीचे प्रकार सुरू केले आहेत. सुरूवातीला काही टास्क पूर्ण करताच रक्कम खात्यात जमा केल्यानंतर नंतर लाखो रुपयांची गुंतवणूक करण्यास भाग पाडून संबंधिताना गंडवल्याचे प्रकार समोर येत आहेत. जळगावातही महाविद्यालयीन लिपिकाला तीन लाख 60 हजार रुपयात गंडवण्यात आले. शनिपेठ पोलिसात या प्रकरणी गुन्हा दाखल करण्यात आला.
अशी झाली फसवणूक
ज्ञानदेव नगर परिसरातील रमेश सोनार (45) हे शहरातील एका महाविद्यालयात लिपिक आहेत. 5 ऑक्टोबर रोजी त्यांना ‘टेलिग्राम’ अ‍ॅपवरून एका अज्ञात व्यक्तीचा संदेश आला. त्या संदेशात ‘व्हिडिओ आणि फोटो लाईक केल्यावर प्रत्येक लाईकवर 100 रुपये मिळतील, असे सांगण्यात आले होते. सुरुवातीचे काही ‘टास्क’ पूर्ण केल्यानंतर सोनार यांच्या खात्यात 660 जमा झाले. त्यावर विश्वास बसल्याने त्यांनी पुढील टप्प्यात सहभाग घेतला.
यानंतर ठगांनी त्यांना ‘क्रिप्टोकरन्सी’ आणि ‘बिटकॉइन टास्क’मध्ये सहभागी होण्यास सांगून मोठ्या नफ्याचे आमिष दाखवले. ‘28 हजार भरल्यास 42 हजार मिळतील,’ असे सांगत त्यांना क्रमाक्रमाने अधिक पैसे गुंतवण्यास प्रवृत्त केले. या प्रलोभनाला भुलून सोनार यांनी आपल्या बँकांच्या क्रेडिट कार्डांचा वापर करून विविध खात्यांमध्ये एकूण तीन लाख 60 हजार रुपये ट्रान्सफर केले.
8 ऑक्टोबर रोजी जेव्हा त्यांनी ‘मिन्ट’ नावाचे खाते तपासले, तेव्हा नफ्याऐवजी खात्यात दीड लाख रुपयांचा तोटा दिसला. त्यांनी याबाबत चौकशी केली असता, ‘डेटा रिपेअर’साठी आणखी दीड लाख रुपये भरण्याची मागणी करण्यात आली. यानंतर त्यांना आपल्या फसवणुकीची जाणीव झाली आणि त्यांनी तत्काळ शनिपेठ पोलिसांकडे धाव घेतली.
